Бу туһунан бэҕэһээ Ил Дархан Өлүөхүмэҕэ сылдьан иһитиннэрдэ. Саҥа эбийиэк Саха ААССР 100 сылын көрсө тутуллуоҕа. Бу туһунан Ил Дархан уонна бырабыыталыстыба пресс сулууспата иһитиннэрэр.
Күн бүгүн Оҕо дьоҕурун уонна гуманитарнай үөрэхтээһини сайыннарар Киин 1992 сыллаахха тутуллубут икки мэндиэмэннээх мас дьиэҕэ үлэлии олорор. Манна 6 саастарыттан саҕалаан оҕолор билим-чинчийэр үлэтигэр бастакы хардыылары оҥороллор, экологическэй үөрэхтээһини ааһаллар. Бу Киин иитиллээччилэрэ араас таһымнаах күрэхтэргэ үчүгэй көрдөрүүлээхтэр. Оннооҕор норуоттар икки ардыларынааҕы күрэхтэр 11 кыайыылаахтара, 6 Арассыыйа бэрэсидьиэнин гранын хаһаайыттара уһаарыллыбыттар.
“Мин бу Кииҥҥэ сылдьыбыппыттан астынным. Манна чахчы идэлэригэр бэриниилээх педагогтар үлэлииллэр, талааннаах оҕолор үөрэнэллэр. Кинилэр үлэлэрин түмүгэ астыннарар. Ол эрэри, кыбыс-кыараҕас хаарбах дьиэҕэ дьарыктаналлара хомотор. Онон, өрөспүүбүлүкэ 100 сылын көрсө саҥа дьиэни тутан киллэриэхпит диэн эрэнэбин”, - диэтэ Айсен Сергеевич.
Өлүөхүмэ улууһугар Айсен Николаев өссө эбии икки үөрэх кыһатыгар сырытта. Токкоҕо “Кэскил” оҕо уһуйаанын тутуутун хаамыытын кытары билистэ, бу саҥа уһуйаан атырдьах ыйыгар тутуллан бүтүөхтээх. Маны таһынан, Ил Дархан Даппарайга Кыыллаах орто оскуолатыгар сырытта.
