Биһиги Кыым.ру аан ситиммит сонун тутар бассааптаах нүөмэригэр ааҕааччыбыт Е. көмө көрдөөн суруйда. Кини Валерий Леонтьев кэнсиэригэр атыыласпыт билиэтин харчытын кулун тутар ыйтан быһа төнүннэрэ сатыыр да, кыаллыбат.
Санатан эттэххэ, бу кэнсиэр маҥнай ыам ыйын 25 күнүгэр Дьокуускайга буолуохтаах этэ. Онтон Аfisha Ykt нөҥүө баран испит билиэт атыытын кытта ситимнээх айдаантан кэнсиэри кулун тутар 17 күнүгэр көһөрбүттэрэ. Сотору буолаат, кэнсиэри балаҕан ыйын 4 күнүгэр көһөрөбүт диэн биллэрбиттэрэ.
Биһиги ааҕааччыбыт Е. үчүгэй миэстэлээх 15 тыһ. солк. билиэти Аfisha Ykt нөҥүө буолбакка, тэрийээччи Станислав Егорович С. бас билэр каартатыгар мобильнай баанынан төлөөн атыыласпыт. Онтон кэнсиэри иккистээн көһөрбүттэригэр, кыайан сылдьыбаппын диэн, тэрийээччиттэн харчытын төнүннэрэргэ көрдөспүт.
Онуоха, тэрийээччи харчыгын кэнсиэр буолуон икки нэдиэлэ – биир ый иннинэ (ол эбэтэр, атырдьах ыйын саҕаланыыта эбэтэр ортото) төнүннэриэхпит диэн эрэннэрбит. Биһиги ааҕааччыбыт харчытын этиллибит кэмҥэ эмиэ ирдэһэн көрбүт даҕаны, тэрийээччи куруубайдаан баран кинини «хара испииһэккэ» киллэрбит. Ити күнтэн ыла ааҕааччыбыт тэрийээччини кытта кыайан сибээстэспэтэх. Эрийдэҕинэ, мэлдьи «номер недоступен» диэн буолар.
Онон, биһиги бүгүн, ааҕааччыбыт көрдөһүүтүнэн, тэрийээччи Станислав Егорович С. нүөмэригэр эрийдибит. Хата, «хара испииһэккэ» киирэ илик буоламмыт, төлөпүөнэ ыҥырар. Ол эрээри, ылбат. Сотору буолаат, «Сатаан кэпсэппэппин, куолаһым сүппүт» диэн СМС кэллэ. «Леонтьев кэнсиэрэ хаһан буоларый» диэн ыйытыыбытыгар «Ырыаһыт кэнсиэрин тохтотто, онон буолбат. Сөмөлүөккэ билиэт ылбыт харчыбытын уонна төлөөбүт гонорарбытын төттөрү ыыттаҕына, билиэт харчытын төнүннэрэн саҕалыахпыт» диэн хоруйдаата. «Оттон тус каартаҕар ыытан төлөөбүт дьоҥҥо хаһан төнүннэрэҕит?» диэн ыйытыыга улаханнык кыыһыра сыста уонна «бары мин счетум нөҥүө атыыласпыттара, онон бары тэҥҥэ күүтэллэр, ол иһигэр бэйэм эмиэ» диэн мас-таас курдук түмүктээтэ.
Биһиги бу, өҥөнү туһанааччы быраабын кэһиини арылыччы көрдөрөр, хаһан түмүктэнэрэ биллибэт устуоруйаҕа ыйытыыбыт элбэх. Онно барытыгар хоруй булар бүгүҥҥү туругунан кыаллыбат. Олортон сороҕун эттэххэ, «Триумф» успуорт киинэ» судаарыстыбаннай бүддьүөт тэрилтэтигэр буолуохтаах кэнсиэркэ билиэт атыыта тоҕо биир киһи бас билэр бааннаах каартатын нөҥүө барарый (кырата - 3000 миэстэ атыыланыахтаах эбит)? Тэрийээччи харчыны тоҕо ылбытын курдук төттөрү биэрбэт? Тэрийээччи төлөпүөнэ харчыларын ирдэһэр дьоҥҥо тоҕо «арахса сылдьар»? Тустаах уорганнар бу көстөн турар най барыыны тоҕо хонтуруоллаабаттар, тоҕо тохтоппоттор? Баҕар, бу ыйытыыларга тэрийээччи бэйэтэ хоруйдаарай?
Дьиктитэ диэн, Валерий Леонтьев саайтыгар Дьокуускайга балаҕан ыйын 4 күнүгэр буолуохтаах кэнсиэр биллэриитэ билигин да ыйанан турар...
Бэйэ кэр.
Сэҥээриилэр