Ньурбалар тыйаатыр тутулларын өр да күүппүттэрэ. 250 миэстэлээх драматическай тыйаатыр тутуута быйыл силигэ ситэн, ис-тас үлэтэ түмүктэнэн, тупсаҕай көрүҥнэннэ.
«Үлэбэр кэлэ-бара тыйаатыр таһынан ааһар буолан, таһырдьа ыытыллар үлэлэри көрөн ааһааччыбын. Бу да сырыыга аттынан ааһан иһэн тугу оҥороллорун интэриэһиргээн сурастым», - диэн Ньурба олохтооҕо Антонина Семенова “Огни Ньурбы” саайка суруйар.
Дьокуускайтан «Альянс» ХЭО тутуу тэрилтэтэ кэлэн тыйаатыр таһыгар амфитеатр уонна хачыал тутуутун ыытар эбит. «Альянс» ХЭО ген. Дириэктэрэ Арылахов Василий Анатольевич:
"Биһиги Дьокуускай куораттан бэһиэ буолан кэлэн тыйаатыр таһыгар тимири иһэрдэн олохтору (амфитеатр) оҥоро сылдьабыт. Кытыыларыгар икки ыскаамыйылар баар буолуохтара. Үөһээ өттүгэр кыраһыабай көстүүлээх 9 колонналары туруортаатыбыт. Биһиги Дьокуускайдааҕы «Айар» ХЭО (ген. дириэктэр Саргылана Петровна Филиппова) дизайнердарын кытары бииргэ үлэлэһэбит, кинилэр ис-тас көстүүтүн киэргэтэн оҥордулар. Бу иннинэ Дьокуускайга ДСК-ҕа оҕо былаһааккатыттан саҕалаан, уо.д.а.элбэх тутуулары ыытан кэллибит", - диэн кылгастык билиһиннэрбит.
Аттыгар баар хачыаллары оҥорууга Ньурба олохтоохторо Данил Романов, Прокопий Матвеев дуогабардаһан кэлэн, көмөлөһөн үлэлэһэ сылдьаллар эбит.
Тыйаатыр дьиэтин тас көстүүтэ барыта силигэ ситтэҕинэ тупсаҕай көстүүлээх, дьон-сэргэ сынньанарыгар табыгастаах буолуоҕа диэн Антонина Семенова сонунун түмүктүүр.
«Огни Нюрбы» Ньурба улууһун саайтыттан
