Чурапчы улууһун Туора Күөл сэлиэнньэтигэр 90/40 миэстэлээх оскуола-уһуйаан сыл бүтүүтэ үлэҕэ киирэрэ былааннанар. Эбийиэк «2020-2025 сылларга тыа сирин утумнаахтык сайыннарыы» судаарыстыбаннай тосхол «Тыа сирин аныгы көстүүтэ» сүрүн тэрээһинин чэрчитинэн тутуллар.
Икки этээстээх дьиэҕэ, үөрэнэр кылаастары таһынан, успуорт уонна аактабай саалалар, лингафоннай хос, остолобуой, бибилэтиэкэ, суунар хостор, маһынан уһаныы мастарыскыайа, дьиэни-уоту тэринии хоһо, быраас хоһо, процедурнай, оттон уһуйааҥҥа - үс бөлөх, методика хоһо, муусуканан дьарыктанар уонна эти-сиини чэбдигирдэр саалалар уонна да атыттар баар буолуохтара. Саҥа оскуола-уһуйаан тиэргэнигэр күнтэн, ардахтан хаххалыыр сабыылаах оонньуур былаһааккалар, физкультуранан уонна успуордунан, хаһаайыстыбанан уонна күннээҕи үлэнэн дьарыктанар, массыына уурар анал сирдэр тутуллуохтара.
Билигин 43 үлэһит оскуола ис өттүн оҥороллор, инженернэй ситимин тардаллар. Хайахсыт орто оскуолатын үөрэнээччилэрэ билигин 1929 сыллааҕы хаарбах туруктаах дьиэҕэ үөрэнэллэр.
