Сунтаар сэлиэнньэтин 34 уулуссата аныгы уотунан симэннэ диэн олохтоох дьаһалта иһитиннэрдэ. Судаарыстыбаннай хантараак сүрүн бэдирээччиттэрэ - «СахаСветСтрой» уонна «Туласын» ХЭТ уоту харыстаан туттар консольнай лаампалаах 1 041 остуолбаны туруорбуттар. Бу үлэ «Тыа сирин утумнаахтык сайыннарыы» федеральнай тосхол «Тыа сирин аныгы көрүҥэ» бырайыагын чэрчитинэн ыытылынна диэн СӨ Тутуу министиэристибэтэ чопчулуур.
«Сунтаар сэлиэнньэтин уулуссаларын аныгы уотунан сырдатар үлэ толору ытылынна уонна кэмигэр түмүктэннэ. Бу, биллэн турар, дьон олоҕун тупсарыа уонна уулуссанан куттала суох айаны хааччыйыа», - диэн «СӨ судаарыстыбаннай сакаасчыгын сулууспата» тэрилтэ генеральнай дириэктэрин линейнэй эбийиэктэри тутууга бастакы солбуйааччыта Пуд Федоров бэлиэтээтэ.
