Үөһээ Бүлүү улууһун Балаҕаннаах агро хайысхалаах оскуолатыгар "Гражданскай килбиэн" бэлиэ хаһаайына Дугуйдаан Семенович Винокуров, ыҥырыылаах ыалдьыт быһыытынан кэлэн, оскуола коллективын, үөрэнээччилэрин көрүстэ. Көрсүһүүнү Балаҕаннаах оскуолатын директора Жендринскэй Степан Алексеевич салайан ыытта.
Дугуйдаан Винокуров, Мичил Неустроев 2021 сыл кулун тутар 5 күнүттэн Өймөкөөн улууһуттан арахсан, 1 сыл 4 ый устата Россия араас уобаластарын нөҥүөлээн, бэйэлэрин дьулуурдарын уонна саха атын тулуурун көрдөрөн, дойду тэбэр сүрэҕэр Москва куоракка 2022 сыл от ыйын 15 күнүгэр айаннаан тиийбиттэрэ. Кинилэр бу уһун унньуктаах, хорсун айаннарын Саха сирин Автономията 100 сыллаах өрөгөйдөөх үбүлүөйүн көрсө диэн сыал-сорук туруорунан тиийбиттэрин, бүттүүн саха норуота үөрэн-көтөн, сэргээн уонна киэн туттан, махтанан туран, бу үчүгэй сонуну уруйдаан-айхаллаан көрүстүлэр.
Дугуйдаан Винокуровы Үөһээ Бүлүү улууһун Нам нэһилиэгин күтүөтүн быһыытынан билэбит. Кини кэргэнэ Винокурова Екатерина Аркадьевна, кыыстара Диана 5-с кылаас үөрэнээччитэ, уоллара Дархан 3 кылааска үөрэнэр. Бу уһун унньуктаах, сииги-силлиэни, уот куйааһы ортотунан айанныылларыгар, Дугуйдаан доҕоро Мичил Неустроев Новосибирскай куоракка тиийэн баран Саха сиригэр төннүбүтүн кэннэ, Дугуйдаан Татарстан республикатын киинигэр Казань куоракка дылы соҕотоҕун айаннаан тиийбитэ. Казань куораттан Москваҕа дылы 700 км. усталаах сири уолунуун Дарханныын айанаан тиийбиттэрин бүтүн Саха Сирэ эрэ буолбакка, атын уобаластар улаханнык сэргээн, сөҕөн-махтайан, үтүө сураҕы истэн үөрбүттэрэ.
Бу айан саха атын тулуурун эрэ көрдөрөр буолбатах, оҕону өбүгэбит саҕаттан сүрүн дьарыкпытыгар сыһыаран үөрэтии, олоххо кытаанах тулуурдаах гына иитии боппуруостара буоларын эмиэ сонурҕуу, сыаналыы көрөбүт. Дугуйдаан Винокуров тылыттан-өһүттэн иһиттэххэ, үрдүк култууралаах, киэҥ билиилээх эдэр киһи буоларын сөхтүбүт-махтайдыбыт. Кини инники өттүгэр саха сылгытын өссө сайыннарар уонна төрүт сылгыбыт ахсаан өттүнэн элбииригэр кэккэ этиилэрдээх, былааннардаах киһи эбит. Уһун айаҥҥа араас дьону көрсөн, кэпсэтэн атын уобаластар сонун сирдэригэр сылдьан, кинилэр олохторун-дьаһахтарын уонна Дьөһөгөй оҕотугар истиҥ сыһыаннарын билсэн, элбэҕи билбит-көрбүт, ону инники үлэтигэр-хамнаһыгар туттар, туһанар баҕа санаалаах эбит.
Кырдьык, история кэрэһэлииринэн, 340 сыл анараа өттүгэр Тыгын Дархан сиэнэ Бөдьөкө уола Маһара, нууччатытан эттэххэ, Маһара Бозуков доҕотторун кытта Москва куоракка айаннаан тиийбиттэр эбит. 31 саастаах Дугуйдаан Винокуров саха саарына, киһи кэрэмэһэ буолан, бу 340 сыл анараа өттүгэр историяҕа киирбит айаны хатылаабыт бастакы саха киһитэ буолбутунан бүтүн саха дьоно-сэргэтэ барҕа махтал тыллары этэбит, киэн туттабыт!
Үөһээ Бүлүү улууһун Балаҕаннаах нэһилиэгин баһылыга,
Саха Республикатын норуотун хаһаайыстыбатын
үтүөлээх үлэһитэ Степан Дмитриев
