Киир

Киир

Ардыгар элбэх кыбартыыралаах дьиэлэргэ хапытаалынай өрөмүөн кэнниттэн араас итэҕэстэр көстөн кэлэллэр. Оннук түгэҥҥэ ким эппиэттиирин Госстройжилнадзор управлениетын салайааччыта Павел Аргунов быһаарар.

Өрөмүөн кэниттэн итэҕэстэр көһүннэхтэринэ, олохтоохтор бастаан тугу гыныахтаахтарый?

- Бастатан туран, СӨ Хапытаалынай өрөмүөн пуондатыгар үҥсүү суруйуохтаахтар.  Тоҕо диэтэххэ, олохтоохтор ити тэрилтэни кытта дуогабар түһэрсэллэр. Пуонда өрөмүөн үлэтэ туттарыллыбытын туһунан аахтаҕа илии баттаммыт күнүттэн биэс сылтан кылгаһа суох кэмҥэ үлэ хаачыстыбатыгар, көстүбүт итэҕэстэри туоратыыны хойутаан уонна куһаҕаннык толоруу иһин эппиэтинэһи сүгэр. Өскөтүн хапытаалынай өрөмүөн иһин төлөбүр анал счекка хомуллубут буоллаҕына, эппиэтинэс счету бас билээччигэ (УК эбэтэр ТСЖ) сүктэриллэр.

Ол эбэтэр, олохтоохтор бэйэлэрэ исписэлиистэри булан эспэртиисэ ыыталлара ирдэммэт буоллаҕа?

- Үөһэ этиллибитин курдук, олохтоохтор өрөмүөн кэннэ көстүбүт итэҕэстэри туоратыахтарын эбэтэр ону харчынан төлөтүөхтэрин баҕарар буоллахтарына, дуогабардаспыт тэрилтэлэригэр үҥсүү суруйаллара ирдэнэр. Тэрилтэ онно сөптөөх хоруйу биэрбэт эбэтэр аккаастыыр түгэнигэр, олохтоохтор эспиэр наймылаһан хоромньу кээмэйин суоттатыахтарын сөп. Ол мөккүөрү суут нөҥүө быһаарарга туһалаах буолуо.  

Олохтоохтор өрөмүөн хайдах баран иһэрин хонтуруоллуур бырааптаахтар дуо?

- Хайа баҕарар өҥөнү туһанааччы курдук, харчы төлүүр дьон  өрөмүөн хайдах баран иһэрин хонтуруоллуур бырааптаахтар. Ону таһынан, үлэ олохтоохтор истэриттэн боломуочуйалаах бэрэстэбиитэл баарыгар эрэ саҕаланыахтаах уонна түмүктэниэхтээх. Олох көрдөрөрүнэн, мөккүөр үксэ суукка тиийбэккэ эрэ быһаарыллар. Туһааннаах тэрилтэ хаачыстыбата суох өрөмүөн туһунан үҥсүүгэ хоруй биэрбэт эбэтэр аккаастыыр түгэнигэр биһиэхэ,  Госстройжилнадзор управлениетыгар суруйуоххутун сөп. Дьиэ олохтоохторо бары илии баттаан биир суругу ыыттахтарына ол ордук дьайыылаах буолуоҕа.

Госстройжилнадзор управлениетын пресс-сулууспатын
матырыйаалыттан тылбаастанна
 
Хаартыска: https://pulse.mail.ru
Тарҕат:

Санааҕын суруй

Бүтэһик сонуннар