Ил Дархан Айсен Николаев уонна улуус баһылыгын эбээһинэһин толорооччу Степан Кузьмин Амма улууһун социальнай-экэнэмиичэскэй сайдыытын билиҥҥи туругун уонна инникитин кэпсэттилэр.
Баһылык эбээһинэһин толорооччу иһитиннэрбитинэн, улууска ынах уонна сылгы сүөһү ахсаана элбээбит. От былаана 98% туолбут. Тыа хаһаайыстыбатын кыылларын кыстыыр аһылыгынан хааччыйбыттар. Социальнай эбийиэктэр кыһыны туоруурга бэлэмнэр. Ил Дархан инникитин улууска тыа хаһаайыстыбатын өйөбүлэ улаатыаҕын, бөдөҥ хаһаайыстыбаларга хотоннору тутууга, бурдугу үүннэриигэ болҕомто күүһүрүөҕүн бэлиэтээтэ.
Көрсүһүүгэ, бастатан туран, байыаннай сулууспалаахтары уонна кинилэр дьиэ кэргэттэрин өйүүр миэрэлэргэ тохтоотулар. Айсен Сергеевич региональнай уонна муниципальнай өйөбүл хайдах бэриллэн иһэрин үчүгэйдик хонтуруоллуулларыгар көрдөстө.
Улууска анал байыаннай дьайыыларга барбыт биир дойдулаахтарын кытта сибээстэһэр, кинилэр көрдөһүүлэрин тута толорор соруктаах гуманитарнай көмө пуондата тэриллибит. Нэһилиэк баһылыктара уонна тэрилтэ салайааччылара байыаннай сулууспалаахтар дьиэ кэргэттэригэр мууһунан, оттор маһынан хааччыйан көмөлөһөллөр.
Маны таһынан, салайааччылар үрдүк күүрүүлээх «Сулҕаччы-Амма» уот ситимин тардыы уонна 110 кВ «Амма» аччыгый станция тутуутун уонна 2024 сылга ыытыллыахтаах Олоҥхо ыһыаҕын туһунан кэпсэттилэр. «Тыа сирин утумнаахтык сайыннарыы» (Комплексное развитие сельских территорий) тосхолунан чэрчитинэн икки нэһилиэккэ култуура эбийиэктэрин тутуохтара.
Улууска 13,15 тыс. кв. м. иэннээх хаарбах дьиэлэртэн олохтоохтору көһөрүөхтээхтэр. Бүгүҥҥү туругунан, хайыы-сах 8 тыс. кв. м. иэннээх хаарбах дьиэлэртэн көһөрүү барбыт. Алтан уонна Амма сэлиэнньэлэригэр больдоммут кэмҥэ уу ситимин тардыахтара. Улуус киинигэр лиссиэй саҥа дьиэтэ тутуллуо. Оскуолалары, уһуйааннары, хочуолунайдары тутуу салҕанан барыа.
Сонун төрдө: СӨ Бырабыыталыстыбатын уонна Ил Дарханын пресс-сулууспата
