Сэтинньи 3 күнүгэр Горнай улууһун Кировскай нэһилиэгэр Сомоҕолоһуу күнүнэн "Дойдубут туһугар - биир сомоҕо" диэн дэбиистээх аһымал киэһэтэ ыҥырыынан уонна контрагынан анал байыаннай дьайыыларга сылдьар уолаттарбытыгар уонна кинилэр дьиэ кэргэттэригэр көмө оҥорорго туһуланна.
Кэнсиэргэ кыттыыны ыллылар "Одуванчик" уһуйаан иитиллээччилэрэ, үлэһиттэрин ансаамбыллара, Кировскай орто оскуолатын үөрэнээччилэрэ, оскуола кэллэктиибэ, нэһилиэк талааннаах ыччата, "Күн дьырылы", "Даҕай" этнофольклорнай бөлөхтөр. Анал ууруллубут дьааһыкка, "Уолаттарбыт санаалара кытаанах, туруктара бөҕө буоллун, этэҥҥэ сырыттыннар..", диэн алҕаан туран Иванова М.Н., Леонтьева Е.Н. уонна да атын бэйэлэрин көмөлөрүн уктулар. Мобилизацияламмыттарга анаммыт пуондаҕа билиҥҥи туругунан 54 500 солк. киирбитэ. Ол иһигэр оскуола кэллэктиибэ (дириэктэр Алексеев И.Е., профком бэрэсс. Попова И.Г.) 27 500 солк. хомуйан туттардылар.
Маны таһынан, оскуола кэллэктиибэ Попов А.Ф., Васильев Л.В., Антонов Д.Д., Кириллов Д.В. дьиэ кэргэттэригэр аһылык наборун туттардылар. Урбаанньыт П.Н. Павлов Л.В. Васильев дьиэ кэргэнигэр 3000 сууммалаах ас наборун биэрдэ. Олохтоох дьаһалта кэллэктиибэ бу икки оҕолоох ыалга күннээҕи кыһалҕаларыгар куруук күүс-көмө буоларыгар улахан махтал.
Бүгүҥҥү туругунан, анал пуондаҕа эбии 27 400 эбии киирдэ. Кэнсиэрдинэн 12 100 солк., анал дьааһыкка 15 300 солк., уопсайынан, пуондаҕа 81 900 солк. киирдэ. Көмө аахсыйаҕа кыттыспыт үтүө санаалаах дьоммутугар махтал. “Эһиги үтүө санааҕыт уолаттарбытыгар бөҕө туругу, өйөбүлү биэрдин” диэн Кировскай дьаһалтатын баһылыгы солбуйааччыта Аргунова С.В. махтал тылларын эттэ.
