Киир

Киир

Саҥа талыллыбыт Солоҕон нэһилиэгин баһылыга Александра Павловна Александрова, өбүгэбит үтүө үгэһин салҕаан, чугастааҕы кыра күөллэргэ күһүҥҥү муҥханы тэрийэри көҕүлээтэ. Бу күннэргэ Чохооной, Сытыган, Таала күөллэрин муҥхалыырга түөрт уончалыы киһи кытынна. Ордук Сытыган күөлэ, элбэх лэһигирэс собонон күндүлээн, дьонун-сэргэтин үөртэ. Манна сылдьыбыт дьон, куул аҥаардыы инчэҕэй собону ылан, илии тутуурдаах, өттүк харалаах тиийэн, дьиэ кэргэттэрин уот диэки көрдөрдүлэр. Айылҕабыт бэрсиититтэн нэһилиэкпит кырдьаҕастардаах ыалларыгар биирдии солуур собону түҥэтэн, үөрбүт ыал үксээтэ. 

Быйыл күһүн 97 сааһын туолбут улууспут Бочуоттаах олохтооҕо, бар дьоно ытыктаан Сэбиэт Маарыйа диэн ааттыыр Мария Григорьевна Тарасова дойдутун дьонугар, ыччатыгар бары үтүөнү баҕаран туран, Солоҕон нэһилиэгин салалтатыгар, дьокутааттарыгар барҕа махталын тиэрдэр. Минньигэс собо миинин хайгыы олорон, Мария Григорьевна сүдү кырдьаҕаспытын Уустарабыһы ахтан-санаан ааста. Семен Григорьевич Алексеев-Уустарабыс Аҕа дойду Улуу сэриитин кэмигэр муҥханы баһылаан-көһүлээн тэрийэн, бар дьонун аччыктыыртан быыһаабытын саас-сааһынан сэһэргээтэ, үтүө үгэс умнуллубатаҕыттан долгуйда.  

Александр Тарасов, нэһилиэк Бочуоттаах олохтооҕо

Тарҕат:

Санааҕын суруй