Хаҥалас улууһун Тойон Арыы сэлиэнньэтин олохтоохторо Анна Алексей Никитиннэр 2013 с. аймахтарын сүөһүтүн холбоон, бааһынай хаһаайыстыбатын тэриммиттэр.
Бастаан "Саҥа саҕалааччы фермер" диэн Тыа хаһаайыстыбатын министиэристибэтин (ТХМ) граныгар кыттан, 1.5 мөлүйүөн суумалаах көмөнөн трактор ылбыттар уонна 50 төбө турар хотонун туттубуттар.
2021 с. ТХМ "Семейный фермер" граныгар кыттан, 13 мөлүйүөнү ыланнар саҥа трактор, прицепной техника, водовоз уонна да атын тыа хаһаайыстыбатын үлэтигэр наадалаах тэриллэри булуммуттар.
Билиҥҥи туругунан Никитиннэр 138 ынах сүөһүлээхтэр 82 ыанар ынахтаахтар. Сайын устата аймахтарын кытта 300 т оту оттуур эбиттэр. Кыһын устата ол тиийэр, эбии 4 т комбикорм ылабыт дииллэр.
Ханна да буоларын курдук сир тиийбэтэ ынах сүөһүнү иитэргэ улахан мэһэй буолар дииллэр. Биир улахан боппуруос – үлэһит илии көстүбэт, саҥа хотонноругар киирдэхтэринэ 6 үлэһит наада буолар, билигин 3 үлэһиттээхтэр. Ынахтара хотон иһигэр уулуур буолан абыраммыттар.
Үөһээ Бүлүү улууһугар: Ороһу нэһилиэгэр Айсен Түүлээхэп, Павловтар уонна Симон Быккасов, Балаҕаннаахха П.В. Кардашевскай уонна улуус киинигэр Семенова А.Т. бааһынай хаһаайыстыбалара үрүҥ илгэни оҥоруунан анаан дьарыктаналлар.
П.В. Кардашевскай уонна А.Т. Семенова бааһынай хаһаайыстыбаларыгар анал оттуур сирдэрэ тиийбэт. Дьон оттуур сирин улахан бырыһыаҥҥа түүлэһэн оттоон, итиччэ элбэх сүөһүлэрин сыл кыстатан таһаараллар. Онон үрүҥ илгэни оҥороллоругар элбэх ороскуоту, түбүгү көрсөллөр.
Ил Дархан Айсен Сергеевич Николаев 2023 сылы Үлэ сылынан бүтүн республика үрдүнэн биллэрбитинэн, бу хаһаайыстыбаларга ТХМ, ТХУ улахан болҕомтону ууран, бааһына сирдэри оҥорорго, күрүө туттуутугар, элбэх сыллаах от ыһалларыгар үбүнэн өйүүр үлэни ыытан наада.
Оттон нэһилиэк дьаһалталара сирин-уотун быһаарыыга үбүлээһин баар буоллаҕына, күрүөлээһин боппуруостарыгар үлэлэһиэхтээхпит.
