Сайыммыт, дьэ кэллэ бадахтаах. Ону сэргэ Дьокуускай куораппыт кирэ-хоҕо, быыла барыта өрүкүйэн тахсан кэллэ. Куорат кытыы уулуссалаларын туругун этэ да барыллыбат...
Илэ хараххынан көрбүттээҕэр сэрэйбит ордук. Куораппыт көҕөрдүүтүн, оту-маһы олордуутун чугастааҕы сылларга кэтэспэппит эрэбил. Син биир туох даҕаны хамсааһын тахсыа суох быһыылаах. Бүтүн куораты көҕөрдүү үлэтигэр анаан үлэлиир тэрилтэ баара дуу, суоҕа дуу. Билбэппит. Онно-манна суруйалларынан “куоракка садовод идэлээх киһи наада” дэһэллэр даҕаны, ол ыра санаа эрэ курдук.
Атын бөдөҥ, кыра куораттарга бара сылдьан, олохтоохтор суугунас кэрэ айылҕа, от-мас ортотугар олороллорун көрө ымсыыраҕын. Биһиэхэ аҕыйах ахсааннаах нэһилиэнньэлээх кыра куоракка дьэ ити көстүү кыаллыбата хомолтолоох. “Хаһаайын хайдаҕа тиэргэниттэн биллэр” диэн өс хоһоонун сөпкө даҕаны этэллэр эбит. Куораппыт киин уулуссалара өр сыллаах өрөмүөн кэнниттэн тупсан, кэрэтийэн тахсалларын олохтоохтор долгуйа кэтэһэбит. Биһиги куораппыт даҕаны сайдан, күөх үүнээйинэн чэлгийэн, быыла-буора аҕыйыырыгар эрэлбит улахан. Кэнники сылларга суолбут-ииспит өрөмүөннэнэн тупсубута мэлдьэһиллибэт. Ол да буоллар, көҕөрдүү боппуруоһа куораппытыгар син биир сытыы кыһалҕаҕа кубулуйбутун олохтоохтор бары көрө-истэ, билэ сылдьабыт.
Хаартыска: https://sakhaday.ru
