Бэс ыйын 1 күнүгэр, Оҕо көмүскэлин күнүн көрсө, Ярославскай аатынан түмэл балаҕаныгар “Лучики Света” диэн “СӨ ДЦП-лаах уонна өйдөрүгэр кэһиллиилээх оҕолоругар көмөлөһөр уонна өйүүр киин” уопсастыбаннай тэрилтэ 10 сыллаах үбүлүөйэ буолла.
Ити күн биһиги араас диагностаах инбэлииттээх иитиллээччилэрбит улахан дьиэ кэргэннэрин кытты ким бэйэтэ хааман-сүүрэн, ким кэлээскилээх, ким тайахтаах, ким көтөхтөрөн кэлэн муһуннулар. Биһиги бары оҕолорбут доруобуйаларын чөлүгэр түһэр сыаллаах-соруктаах биир улахан дьиэ кэргэн буолабыт.
Төһө да куйаас күн буоллар, бырааһынньык бэркэ табылынна. Урбаанньыттар М.Н. Акимова “Столица” кафетын минньигэс аһылыгын, А.А. Тагдиралиев оҕуруотун аһын уонна фруктатын, “Якутия” ФАПК утахтарын, иитиллээччибит Эвелина ийэтэ Ж.В. Костина уонна блогер, кондитер Артем Винокуров оҥорбут туортарын амсайдыбыт.
Бырааһынньыкпыт “Арчы” дьиэтин үлэһитэ С.И. Алексеев ситиһиилээх уонна үтүө сылы дьылы алгыһынан саҕаланна. Тэрээһииммитин ийэлэрбит, “Лучики Света” РОО салайааччыта И.В. Рассейкина уонна тэрилтэ көхтөөх кыттыылааҕа В.В. Матвеева-Егорова иилээн ыыттылар. Эҕэрдэ нүөмэр да элбэх этэ. Ол курдук, бу үөрүүлээх күнүнэн үтүө эҕэрдэлэрин 10 саастаах Витя Рассейкин, 14 саастаах Дарья Баховец, 8 саастаах Евгения Плотникова, 9 саастаах Максим Колесов, 7 саастаах Ева Матвеева, ыҥырыылаах ыалдьыттар, 4 саастаах Матвей Меликян уонна В.С. Скрябин салайааччылаах “DANCЕ Generation” брейк-данс үҥкүү оскуолата тиэртилэр.
Эҕэрдэ нүөмэрдэри таһынан, бырааһынньыкка мустубут оҕолору “Айар Уустур” креативнай индустрия колледжын аква-гримҥэ маастардара, кураатар Д.В. Поскачин, уруһуй биридимиэтин уһуйааччыта А.П. Захарова, устудьуоннар Валерия Потапова, Валерия Никифорова уонна Карина Семенова аралдьыттылар. Үтүө успуонсарбыт, биһигини мэлдьи өйүүр “Алмаасэргиэнбаан” АКБ (салайааччы Н.Н. Долгунов) аниматордары ыҥыран сэргэхситтэ. Саамай бастыҥ доҕотторбут, В.С. Назарова “Мэрри Поппинс” чааһынай уһуйаанын иитээччилэрэ кэлэн олус үчүгэй маастар-кылаастары ыыттылар.
Биһиги, “Лучики Света” сүрүннээччилэрэ, сыл аайы бу күн хайаан даҕаны бастакы кылаастарбытын, оскуоланы бүтэрээччилэрбитин уонна тэрилтэбит көхтөөх чилиэннэрин бэлиэтиир, хайгыыр үгэстээхпит. Быйыл биһиги 7 бастакы кылааска үөрэнэр оҕолоохпут. Онтон үһэ – улууска. Төрдүс кылааһы 11 оҕо, тохсуһу – 4 оҕо (онтон иккитэ – услууска), оскуоланы – 5 оҕо (онтон биирэ – Ньурбаҕа) бүтэрэр.
Түгэни туһанан, улахан махталбытын биһигини мэлдьи, сыл аайы өйүүр эбэтэр тэрээһиммитигэр быйыл саҥа кыттыспыт, киэргэппит, үтүө көмөнү оҥорбут бар дьоммутугар тиэрдэбит: “Якутскэнерго” ПАУо (сал. Г.Н. Алексеев), “Эирстудио” (урбаанньыт Нь.А. Поскачина), “Сюрприз” шар устуудьуйата, “Возхождение” УК (сал. И.И. Данилов), “Добун” устуудьуйа, “Пространство” фото-устуудьуйа, урбаанньыт А.М. Яковлева, “Водоканал” АУо (сал. А.А. Кырдьагасов, буҕаалтыр И.И. Пинчук), СӨ “Кондрагметалл” АУо (А.А. Кычкин).
2014 с. от ыйын 14 күнүгэр уопсастыбанньык, суруналыыс, ураты оҕо ийэтэ В.Д. Чупрова “What’sApp” социальнай ситимҥэ бөлөх арыйан, олох уустуктарын көрсүбүт – инбэлиит оҕолоох – ийэлэри, аҕалары, эбэлэри, эһэлэри түммүтэ. Бөлөх инбэлиит оҕолоох дьон мэдиссиинэ хамыыһыйатын хайдах ааһалларыгар, эмтэнэллэригэр уонна чөлүгэр түһэрии (ол иһигэр Кытайга) туһунан сүбэлиир соруктаах. Эмиэ ити сыл атырдьах ыйыгар өссө биир бөлөх “Вконтакте” арыллыбыта. “Биһиги сорукпут – көрсүһүү, тыыннаах кэпсэтии, кыттыгас тэрээһин. Биһигини бэйэбититтэн ордук ким үчүгэйдик өйдүөй, көмөлөһүөй? Бары бииргэ буоллахпытына – күүстээхпит, тирэхтээхпит”, – диэн Вероника биһигини олохпут уустук түгэнигэр түммүтэ. Онтон ыла хараҥа суол түгэҕэр сырдык сардаҥата кылайбыта.
Бастакы көрсүһүүлэр, кэпсэтиилэр онтон саҕаламмыттара эрээри, мустар сирбит, биир кииммит суох этэ. Ол гынан баран, биһиги феябыт Вероника оччолорго В.П. Душкевич салайааччылаах “Харысхал” пуонданы кытта ыкса үлэлэһэн, онно мустар, ийэлэрбитигэр куруһуоктары ыытар буолбуппут. 2015 с. сэтинньититтэн Вероника Чупрова “Мечты сбываются” аахсыйаны саҕалаабыта. Бу – баҕа санаа туолар алыптаах аахсыйата этэ. Чуолаан, кэлээскэҕэ олорор оҕолор футбол оонньообуттара, оптуобуһунан хатааһылаабыттара уонна кумирдарын кытта көрсүбүттэрэ. Ол сылтан саҕалаан хас сыл аайы Саҥа дьылга иитиллээччилэрбит ыра санааларын өрөспүүбүлүкэ олохтоохторо толорор буолбуттара. Кинилэр көмөлөрүнэн “Мечты сбываются” аахсыйабыт салҕанар.
Вероника Дмитриевна итинэн эрэ тохтоон хаалбатаҕа. Кини ДЦП-лаах уонна өйдөрүгэр кэһиллиилээх оскуола саастаах оҕолор күнүскү сылдьар кииннэрин (уһуйаан курдук) олоххо киллэрэргэ санаммыта. Оччолорго СӨ бэрэсидьиэнэ Е.А. Борисов этэ, кини Вероника Чупрова этиитин сэҥээрбитэ. СӨ Үлэҕэ уонна социальнай сайдыыга миниистирин солбуйааччыны уонна оччолорго куорат мээрэ А.С. Николаевы кытта көрсүбүттэрэ. Кинилэр бары Дьокуускайга оннук киин баар буолуохтаах диэн сөбүлэспиттэрэ эрээри, баҕа санаабыт олоххо киирбэтэҕэ. Ол гынан баран, Вероника Дмитриевна санаатын түһэрбэтэҕэ, кини ураты оҕолор күнүһүн сылдьар 3 дьоҕус кииннэрин арыйбыта: Дьокуускайдааҕы Епархияҕа (2016), ону сэргэ 2017 с. “Би-хэппи” бырааһынньык устуудьуйатыгар кэлээскилээх оҕолор сылдьар 3 кииннэрин; “Лолипоп” оҕо киинигэр уонна “Трапезная” антикафеҕа, Ярославска аатынан түмэл тиэргэнигэр турар спасс манастыырыгар. Онно эмиэ кэлээскилээх сылдьыахха сөбө.
Билигин ДЦП-лаах уонна өйдөрүгэр кэһиллиилээх оҕолор кииннэрэ босхо үлэлиир иитээччилэр суохтарынан, сабыллан турар. Кэлин арыллыа диэн былаанныыбыт.
Күн бүгүн “Лучики Света” тэрилтэҕэ Саха сирин араас муннугуттан 200-чэ ыал киирэр. Куоракка иитиллээччилэрбит ийэлэрин кытта алтыһар, судаарыстыбаннай тэрилтэлэр бэрэстэбиитэллэрин кытта көрсөр кииннээхпит. Онно сылайбыт, сылаарҕаабыт төрөппүттэр кэлэн күннээҕи түбүктэн аралдьыйан, сынньанан бараллар. Ону таһынан, эмтиир физкультура исписэлиистээхпит. Кииммит төһө да кыра буоллар, биһиги, төрөппүттэр, олус түмсүүлээхпит, иллээхпит. Оҕолорбутугар араас куонкурустары тэрийэн, бэс ыйын 1 күнүгэр түмүк таһаарабыт, 4-с, 9-с, 11-с кылааһы бүтэрэр үөрэнээччилэрбитин бэлиэтиибит, оҕолор өрөспүүбүлүкэ таһыгар эмтэнэ баралларыгар харчы хомуйуутугар көмөлөһөбүт. Саҥа дьылга “Мечты сбываются” аахсыйабытын ыытабыт, сытар оҕолорбутун Тымныы Оҕонньору уонна Хаарчаананы кытта көрүһүннэрэбит, бэлэх туттарабыт. Онно барытыгар бар дьоммут, Саха сирин олохтоохторо, күүс-көмө буолаллар.
Билигин бэрэссэдээтэлинэн И.В. Рессейкина үлэлиир. Кини иннинэ Н.В. Маркова уонна В.Д. Чупрова салайбыттара. Түгэни туһанан, тэрилтэбит чилиэннэрэ А.С. Егороваҕа уонна С.Н. Васильеваҕа улахан махталбытын тиэрдэбит. Кинилэр тус кыһалҕаларынан төһө да көхтөөх үлэттэн туорааталлар, сүбэлэринэн-амаларынан ыраахтан мэлдьи көмөлөһө сылдьаллар.
Бу сыллар тухары биһиэхэ үтүө феялар уонна аптаах-алыптаах дьон көмөлөһөн кэллилэр, мэлдьи күүс-көмө буолаллар. Кинилэргэ улахан уонна дириҥ махталбытын ыытабыт.
