Быйыл Таатта улууһугар үгүс саҥа тэриллэринэн сэбилэммит аныгы поликлиника үлэҕэ киирэн, олохтоохтор абыранныбыт аҕай! Улуус кылаабынай бырааһа Сардаана Владимировна Кононова кэскиллээҕи өтө көрөн үлэлиир дьоһуннаах салайааччы буолар. Ол курдук, бу поликлиника үлэҕэ киириитин сэргэ, доруобуйа харыстабылыгар үлэлээбит бары үлэһиттэр ааттара үйэтитиллэр дириҥ ис хоһоонноох искибиэр аһыллыбыта.
Онон, бу күннэргэ норуокка "Таҥара дьону быыһыырга анаан ыыппыт хирура" диэн уос номоҕор ахтыллар Иван Викторович Константинов аатын сүгэр хирургия үлэтин билистим.
Дьэ, манна кэлэн, «Хирургия – доруобуйа харыстабылын хорук тымыра» диэн этэллэрин илэ көрөн, итэҕэйдим. Дьиэтэ-уота тупсаҕайын, ырааһын, үлэһиттэрэ сайаҕастарын, кыһамньылаахтарын, ыарыһахтары оҕолуу бүөбэйдииллэрин көрөн олус астынным.
Уопуттаах хирурдар: салаа сэбиэдиссэйэ Алексей Петрович Семенов, иккис категориялаах хирург; Татьяна Петровна Посельская, үрдүкү категориялаах хирург; Гаврил Гаврильевич Колодезников, хирург; анестизиолог-реаниматологтар: Степан Петрович Эляков, Иван Иванович Соловьев биир хамаанда буолан биир сүбэнэн олус бэркэ үлэлии сылдьаллар, түүннэри-күнүстэри ыалдьар киһини чөлүгэр түһэрэр туһугар туруулаһаллар. Быйыл сайын хас да олус ыарахан түгэҥҥэ суһаллык сөптөөх эппэрээссийэ оҥорбуттарын куораттааҕы кэллиэгэлэрэ хайҕаан кэпсэтэр сурахтарын истэн, хирурдарбытынан киэн тутуннум.
Бэйэбит оҕобут, Уус Тааттаттан төрүттээх Гаврил Гаврильевич Колодезников иккис сылын олус бэркэ үлэлии сылдьар. Хас биирдии ыарыһахха наһаа болҕомтолоох сыһыаннааҕын, оннооҕор күнүн аайы оҥоһуллар бэрэбээскилэри бэйэтинэн көрөн-истэн, оҥорторорун көрөн, олус биһирээтим. Эдэр киһи кэскилэ иннигэр, үүнэн-сайдан иһиэ, аата ааттанар хирург буолуо диэн эрэл санаа кыыма уһугунна.
Сиэстэрэ кыргыттар түргэн-тарҕан, ыраас туттунуулаахтар, эйэҕэс сыһыаннаахтар. Хайа төрүөҕүттэн билэр оҕом, эдэр сылдьан, Харбалаахха дьукаах олоро сылдьыбыт ыалым Валентина, Виктор Тистяховтар кыыстара Наталья Викторовна Федорова бэрэбээски оҥорор сиэстэрэ эбит. Хара маҥнайгыттан наһаа истиҥник көрсөн, сылаастык сыһыаннаһан, ыарыыбын үмүрүттэ.
Санитаркалар үлэлэригэр эппиэтинэстээхтик сыһыаннаһаллара хирургияҕа киирээти кытары көстөр, ыраас, сырдык палааталар ыарыһах түргэнник үтүөрэригэр көмөлөһөргө дылылар. Балыыһа аһа кэмигэр кэлэр, минньигэс, тотоойу.
Түмүккэ, бу эйэлээх кэлэктиип улууспут дьонун араҥаччылаан, эмтээн-томтоон, инникигэ эрэли үөскэтэр үлэлэрэ өссө ситиһиилээх буоллун, үгүс киһи махтала бэриниилээх үлэҕэ кынаттыы турдун диэн баҕа санаам бастыҥын анаатаҕым буолуохтун!
Валентина Кривошапкина. Таатта, Харбалаах
