2023 сылтан Саха Өрөспүүбүлүкэтигэр атыы-эргиэн, административнай-дьыалабыай суолталаах, дьону аһатар, айан суолугар өҥөнү оҥорор, бытовой хайысхалаах эбийиэктэр ахсааннарыгар киирэр хамсаабат баайга нолуок кадаастыр сыанатынан ааҕыллар.
Маннык нолуогунан СӨ Баайга-дуолга уонна сир сыһыаныгар министиэристибэтэ СӨ «Кадаастыр судаарыстыбаннай сыанабылын оҥорор киини» кытта сыл ахсын оҥорор анал испииһэгэр киирбит дьиэлэр, тутуулар уонна дьон олорбот кэмиэрчэскэй хостор хабыллаллар.
Нолуогу ааҕыы саҥа бэрээдэгин киллэрии түһүмэхтэрэ
2023 сыллааҕы нолуок ааҕыллыытыгар ити испииһэккэ Дьокуускай, Мииринэй, Нерюнгри, Алдан уонна Ленскэй куораттарга баар атыы-эргиэн кииннэрэ уонна онно баар хостор киирбиттэрэ. 2024 сылга ыйыллыбыт куораттарга атыы-эргиэн уонна административнай-дьыалабыай эбийиэктэр киирдилэр.
2025 сылтан саҥа ирдэбил өрөспүүбүлүкэ бары нэһилиэктэригэр баар эбийиэктэр уонна дьон олорбот кэмиэрчэскэй, элбэх кыбартыыралаах дьиэлэргэ уонна гараж кээпэрэтииптэригэр турар хостору хабыаҕа.
Кэлэр сыллааҕы испииһэги бу сыл бүтүүтэ бигэргэтиэхтээхтэр.
Хамсаабат баай эбийиэгэ испииһэккэ киирбитин–киирбэтэҕин хайдах билэбит?
2025 сыллааҕы бигэргэтиллэ илик испииһэк СӨ Баайга-дуолга уонна сир сыһыаныгар министиэристибэтин minimush.sakha.gov.ru уонна СӨ «Кадаастыр судаарыстыбаннай сыанабылын оҥорор киинин» cgko.sakha.gov.ru саайтарыгар «Налогообложение по ст. 378.2 НК РФ» түһүмэххэ көрүөххүтүн сөп.
Ону сэргэ, табыгастаах буоллун диэн, эбийиэктэр өрөспүүбүлүкэ каартатыгар «Карты» – «Карта объектов по ст. 378.2 НК РФ» түһүмэххэ бааллар. Манна эбийиэги аадырыһынан эбэтэр кадаастырын нүөмэринэн булуохха сөп.
Бас билээччи хамсаабат баайын эбийиэгэ испииһэккэ киирбитин сөбүлэспэт буоллаҕына, тугу гынарый?
Ити испииһэк бигэргэтиллиэр диэри бас билээччилэр СӨ Баайга-дуолга уонна сир сыһыаныгар министиэристибэтигэр сайабылыанньа суруйан уларытыахтарын сөп. Ол бэрээдэгэ министиэристибэ уонна судаарыстыбаннай кадаастыр сыанабылын киинин саайтарыгар тахсан турар.
Эбийиэк дьиҥ-чахчы үөһэ ыйыллыбыт эйгэлэргэ туһаныллыбат буоллаҕына, бас билээччи ЕГРН сибидиэнньэтин сөп түбэһиннэрэрэ ирдэнэр. Онон, хамсаабат баай эбийиэктэрин бас билээччилэри бигэргэтиллэ илик испииһэги кытта билсэргэ, итиэннэ сөбүлэспэт түгэҥҥитигэр туһааннаах дьаһал ыларгытыгар ыҥырабыт.
Хаартыска: Судаарыстыбаннай кадаастыр сыанабылын киинэ
