“Туесок” диэн тэрилтэ Саха сиригэр аан бастакы көһө сылдьар маҕаһыыны тэрийбит. Массыына иһигэр баар дьоҕус маҕаһыын суола-ииһэ суох кырыы бөһүөлэктэринэн сылдьар.
Көһө сылдьар маҕаһыыны ЛСП матырыйаалтан оҥорбуттар, икки хостоох: бастакыта – тоҥ ас, иккиһэ – бакалея, утах.
“Тыа сиригэр дьон сүрүннээн бурдугу, мокоруону, мас арыытын, кофены, чэйи уонна минньигэһи атыылаһар”, – диэн “Туесок” хампаанньа пресс-сулууспата суруйар.
Дьон маннык өҥөнү биһирээбит. Ол туһунан олохтоохтор маннык дииллэр.
“Биһиги бөһүөлэкпит Сылан нэһилиэгин кииниттэн уон килэмиэтирдээх сиргэ сытар. Бэйэбитигэр бородуукта маҕаһыына диэн суох. Аһылыкпытын чугастааҕы бөһүөлэктэн тиийэн атыылаһабыт. Онон бу курдук көһө сылдьар маҕаһыын кэлбититтэн олус үөрдүбүт, этэргэ дылы, олохпутун чэпчэттэ. Мантан инньэ кэлэрин кэтэһэр буолуохпут”, – диэн Чурапчы улууһун Сылаҥ нэһилиэгин Бэрэ учаастагын олохтооҕо Наталья Сивцева кэпсиир.
СИА суруйуутуттан.
