Саха сиригэр сыл иһигэр орто хамнас 19%-нан улаатан, 81 274 солкуобайга тэҥнэспит. Ол түмүгүнэн, 2025 сыл тохсунньутугар өрөспүүбүлүкэбит ТОП-3 иһигэр киирбит.
Ол гынан баран, ити үлэһиттэри көрдүүр хампаанньалар “бачча хамнастаах үлэҕэ ылабыт” диэн биллэриилэринэн. Ити туһунан Арассыыйа эрэгийиэннэригэр чинчийиини ыыппыт “Авито” эспиэрдэрэ суруйаллар.
Бастакы миэстэҕэ Сахалин уобалаһа тахсыбыт: онно хамнас сыл иһигэр 25%-нан улаатан, 85 308 солкуобай буолбут. Иккис миэстэҕэ Москуба уобалаһа тиксибит – эмиэ сыл иһигэр киин эрэгийиэн олохтоохторун хамнаһа 20%-нан улаатан, 86 152 солк. тэҥнэспит.
Түргэн тэтимнээхтик улаата турар хамнастаах эрэгийиэннэр ортолоругар өссө Приморье кыраайа уонна Новосибирскай уобалаһа киирбиттэр. 2025 сыл тохсунньутугар ити эрэгийиэннэр тэрилтэлэрэ ааспыт сыллааҕыны кытта тэҥнээтэххэ, 15 уонна 13 бырыһыанынан элбэх хамнастаах үлэһиттэри көрдүүр буолбуттар. Холобур, Приморьеҕа орто хамнас 79 259 солкуобай, оттон Новосибирскайга 63 073 солк. буолбут.
Өссө төгүл бэлиэтээн эттэххэ, эспиэрдэр “ити эрэгийиэннэр тэрилтэлэрэ үлэһити көрдүүр биллэриилэригэр суруйар хамнастара. Онон үлэһит илиитигэр ылар дьиҥнээх төлөбүрүн кытта араастаһыан сөп. Холобур, сорох тэрилтэ эбии буонустаах, бириэмийэлээх, о.д.а. эбии төлөбүрдээх буолар” дииллэр.