Дьокуускайга Киллэм уонна Табаҕа сирдэригэр АБДь кыттыылаахтарын дьиэ кэргэннэригэр сир учаастактарын түҥэтиэхтэрэ. Ол туһунан мээр Евгений Григорьев иһитиннэрдэ. Учаастактары олунньу 25 күнүттэн саҕалаан уочарат быһыытынан тыырыахтара.
– Учаастактары Киллэм уонна Табаҕа бөһүөлэктэригэр түҥэтиэхпит. Бүгүҥҥү туругунан, “ведение садоводства” көрүҥнээх 1396 сир учаастага оҥоһуллан бэлэм турар. Бастакы түҥэтии олунньу 25-с уонна 26-с күннэригэр буолуоҕа, – диэн мээр кэпсээтэ.
“Сир сыһыаннаһыыларын ааҕыныстыбатыгар” номнуо анал байыаннай дьайыы тустаах уочаракка турар 100 кыттыылааҕын уонна кинилэр дьиэ кэргэннэрин ыҥыран кэпсэппиттэр. Сир сэрэбиэйинэн түҥэтиллиэхтээх.
Сэрэбиэй буолар сирэ: Дьокуускай к., Октябрьскай уул. 20/1 дьиэтэ, 3-с этээс (303 хос), “Сир сыһыаннаһыыларын ааҕыныстыбата” МХТ, бириэмэтэ: 09:00 – 12:00 ч.
Ааҕыныстыба салайааччыта Сергей Тимошенко иһитиннэрбитинэн, олунньу 17 күнүгэр Бүлүүлүүр суол 16-с килэмиэтиригэр бэриллэр босхо сири 767 элбэх оҕолоох ыал ылбыт.
