“Арассыыйа дэриэбинэтин олохтоохторо хаары уулларан ууланан олороллор” диэн “Лента.ру” ааҕыныстыба дьоҕус сонуну таһааран, киин Арассыыйа олохтоохторун долгутта.
“Красноярскай кыраай Ачинскай куоратын таһынааҕы 700-чэ нэһилиэнньэлээх Карловка дэриэбинэтигэр киһилии суол да, кииннэммит ититии да, оҕо былаһаакката да суох. Дьон оннооҕор өтөрдөөҕүгэ диэри оптуобус да сылдьыбат этэ диэн үҥсэргиир – чугастааҕы тохтобул 8 км сиргэ баар.
Дэриэбинэҕэ сүрүннээн биэнсийэлээхтэр олороллор, ууну атыылаһар кыахтара суох, ол иһин хаары уулларан ууланар лайфхагы толкуйдаабыттар. Тутуу министиэристибэтэ ууну хачайдыыр башняны уонна ситими 2026 с. кэннэ тутуох буолар”, – диэн “Лента.ру” суруйар.
Ону аахпыт дьон, 240-тан тахса тыһыынча киһи, “настоящее издевательство над людьми” диэн дьону аһыммыттар.
Ити сонуну ааҕан баран бэйэбит дэриэбинэлэрбитин санаан кэлэҕин. Киһи күлүөн дуу, сонньуйуон дуу, ытыан дуу билбэт. Үйэ тухары оннук олорон кэллэхпит. “Сэнээбиттэр”, “күлүү-элэк гыммыттар”, “атаҕастаабыттар” диэбэккэ.
