Улуус олохтоохторо 1960-с сс. саҕаланыыларыгар тутуллубут, өр кэм устата эрэллээхтик сулууспалаабыт эргэ поликлиника тымныы көрүдүөрүгэр исписэлиискэ көрдөрөөрү уһун уочаракка олорбут кэмнэрин өссө да умна иликтэр. Эрэнгиэҥҥэ, флюорографияҕа түһэргэ уонна анаалыһы туттарга атын сиргэ турар тымныы дьиэлэргэ тиэстэллэрэ. Бүгүн ол туһунан санаан ааһыаҕыҥ.
Ол дьиэлэргэ баар чэпчэтинэр сирдэр субу-субу алдьанан сабыллан турар буолаллара. Терапия уонна оҕо отделениелара кыҥнайан турар икки этээстээх дьиэлэргэ бааллара. Оҕо уонна дьахтар консультациялара, тииһи эмтиир кэбиниэт перинатальнай кииҥҥэ этилэр. Инньэ гынан, отделениелар икки ардыларыгар кэлии-барыы күчүмэҕэйдэри үөскэтэрэ, тэйиччи этилэр.
Билигин ол кэм ааһан, дьэ өрө тыыныахпытын уонна эргэ да буоллар үгүс киһини быыһаабыт-абыраабыт балыыһабытын махталынан ахтыахпытын сөп. Тоҕо диэтэххэ, улууспут киинигэр АЛРОСА көмөтүнэн тутуллубут икки этээстээх таас балыыһабыт комплекса үлэлээбитэ номнуо төрдүс сылыгар барда.
Доруобуйа харыстабылын дьиэтин-уотун тутуу 658 мөлүйүөн солкуобай этэ. Ону АЛРОСА хампаанньа үбүлээбитэ. 2015 сыллаахха бастаан барыта 3 тыһыынча кв.м иэннээх эбийиэк бырайыага оҥоһуллубута. Ити кэннэ сыл буолан баран, 2016 сыл алтынньы 5 күнүгэр, Баатаҕай сэлиэнньэтигэр бастакы сыбаайаны түһэрбиттэрэ. Комплекс 5 сыл устата ыытыллан баран, 2021 сыллаахха үлэҕэ толору киирбитэ. Саҥа балыыһабытын үлэҕэ киллэрэ охсоору төһөлөөх элбэх субуотунньук ыытыллыбытын, тэрилтэлэр онно бары үөрэ-көтө көмөлөспүттэрин, дьыаланы өйөөбүттэрин бары олус үчүгэйдик өйдүүбүт.
Билигин балыыһа комплексын иһинэн терапия уонна оҕо отделениелара, поликлиника, оҕо консультацията, тииһи эмтиир кэбиниэт, “Суһал көмө”, рентгенология уонна лабаратыарыйа үлэлии тураллар. Дьон көрдөрүнэригэр, доруобуйатын чинчийтэрэригэр олус табыгастаах буолла. Саамай сүрүнэ – доруобуйаларыгар хааччахтаах дьон харгыһа суох сылдьалларыгар көмөлөһөр тэрилинэн-тээбирининэн толору хааччыйдылар.
Владимир Докторов, Үөһээ Дьааҥытааҕы УКБ сүрүн бырааһа:
– Тыын суолталаах эбийиэкпит үлэлии-хамсыы, дьону-сэргэни көрө турар, хаачыстыбалаах мэдиссиинэ өҥөтүн оҥорор. Саҥа балыыһабытыгар ыарыһахтары бастакы сүһүөх мэдиссиинэ үлэһиттэрэ уонна анал идэлээх исписэлиистэр көрөллөр. Ол иһигэр терапевтар, оҕо быраастара, невролог, хирург, онколог, окулист, тиис быраастара, акушер-гинеколог, дерматовенеролог, инфекционист, рентгенолог уонна да атын быраастар. Балыыһабыт отделениелара бары киэҥ-куоҥ, толору тэриллээх-тээбириннээх, аныгы тэриллэринэн хааччыллыбыт кэбиниэттэргэ үлэлии олороллор.
Саҥа балыыһаҕа чинчийии хаачыстыбалаахтык ыытыллар буолбутуттан, оттон быраастар үлэлиир усулуобуйалара тупсубутуттан биһиги олус үөрэбит.
Быраастарбыт ыарыһахтары саҥа УЗИ аппараатынан, офтальмология чинчийэр тэрилинэн, электрокардиограбынан, дьахтар доруобуйатын чинчийэргэ олус улахан суолталаах маммограбынан көрөллөр-билгэлииллэр. Аны туран, икки саҥа массыынаны ылбыппыт, онтон биирин “Суһал көмө” сулууспатыгар анаан. Итини таһынан, тыҥаны тыыннарар аппараат, дефибриллятор, электрокардиограф, компрессионнай ингалятор, дэҥҥэ-оһолго уонна төрүүргэ туттуллар нобуор курдук ыарахан туруктаах ыарыһах олоҕун быыһыыр, суһал көмөнү оҥорорго көмөлөһөр оборудованиелар кэлиэхтэриттэн, Дьааҥы миэдиктэрин үлэтэ күүһүрдэ. Бэлиэтээн эттэххэ, ити барыта саҥа балыыһа комплекса үлэҕэ киириитин кытта быһаччы сибээстээх.
Биһиги АЛРОСА хампаанньаҕа киһиэхэ саамай күндүтүн – доруобуйатын уонна олоҕун – быыһыырга, харыстыырга көмөлөрүн уонна кылааттарын иһин ис сүрэхпититтэн махтанабыт.
Жанна Никитина, поликлиника ыстаарсай медсиэстэрэтэ:
– Кыраһыабай көстүүлээх мед-көстүүмнэрбитин кэтэн баран, үлэлииргэ табыгастаах, сырдык-ыраас, киэҥ, сылаас саҥа балыыһабыт дьиэтигэр үөрэ-көтө кэлэбит. Оҕо уонна терапия отделениелара поликлиниканы кытта биир дьиэҕэ бааллара олус табыгастаах. Оҕолор, үлэһиттэр уонна ыарыһахтар суунар-тараанар, чэпчэтинэр сирдэрэ тус-туспа оҥоһуллубутуттан киһи үөрэр.
Поликлиникабыт эргэ дьиэтэ олус кыараҕас уонна тымныы этэ. Саҥа балыыһаны кэмигэр туппатахтара буоллар, билигин хайдах үлэлии олорор буолуохпутун киһи өйүгэр оҥорон да көрбөт.
Уруккуларга эбии саҥа функциональнай кэбиниэттэр баар буоллулар. Ол курдук, физиокабинет, УЗИ, ФЛГ, рентгенография, маммография, КТ эбилиннилэр. Көмпүүтэр томографиятын дьэ туруордулар. Үлэһиттэрэ Дьокуускайга тиийэн сэртипэкээттэрин ыллахтарына, сотору үлэлиэхтээх.
Аны сотору кэминэн, үс сылынан, саҥа исписэлиистэри – Нерюнгритааҕы мэдиссиинэ колледжын выпускниктарын күүтэбит. Кинилэр билигин “Арктика” ЦПРК базатыгар Баатаҕайга үөрэнэ сылдьаллар. Кинилэр кэллэллэр, сиэстэрэ тиийбэт кыһалҕатын умнуо этибит. Ол да буоллар, быраас тиийбэтэ билигин да баар суол.
Төһө даҕаны каадырбыт тиийбэтин иһин, поликлиника улуус балыыһатын саамай улахан салаата. Ыстаакка 60 киһилээхпит. 20 сыл үлэлээбит уопуттаах исписэлиис быһыытынан кэлэктииппит олус иллээх, онон биһиэхэ кэлиҥ, барытын үөрэтиэхпит, өйүөхпүт диэн эрэллээхтик этиэхпин сөп.
Түгэни туһунан, өрөспүүбүлүкэбит Бырабыыталыстыбатыгар уонна АЛРОСА хампаанньаҕа махталбытын этэбит.
Тамара Садовникова, терепия отделениетын көрдөрүнээччитэ:
– Мин 1946 сыллаахха төрөөбүтүм, үйэм тухары Баатаҕайга олоробун. Онон бөһүөлэк уруккутун-хойуккутун – барытын өйдүүбүн. Терапия балыыһа атын дьиэлэриттэн туспа олорон үлэлиирэ. Оҕо отделениета, хирургия, «Суһал көмө» эмиэ ойдом тураллара.
Билигин дьиэ-уот тубуста, сылдьарга табыгастаах буолла. Хомойуох иһин, арай бырааспыт тиийбэт. Саҥа балыыһабыт кыраһыабайа сүрдээх, ыраас-хороос, сылаас, бэл, итии да диэххэ сөп. Үчүгэй дьиэҕэ-уокка сылдьан көрдөрүнэрбититтэн үөрэбин. АЛРОСА-ҕа киһилии махталбын ыытабын!
Алексей Дьячковскай, АЛРОСА генеральнай дириэктэрин солбуйааччыта:
– Биһиги Саха сирин олохтоохторугар алмаас хостооһуна чахчы туһалааҕын көрдөрөргө дьулуһабыт. Аҥаардас ол даҕаны иһин хампаанньа нолуогун уонна дивидени өрөспүүбүлүкэ бүддьүөтүгэр төлүүрүн таһынан, хас эмэ миллиард солкуобайы сыл аайы социальнай бырайыактарга анаан көрөр. Ол иһигэр балыыһалары, чөлүгэр түһэрэр Кииннэри тутарга. Ол үлэбит үтүө түмүгүн илэ көрөр, олохтоохтор махталларын истэр олус үчүгэй, салгыы үлэлииргэ кынаттыыр.
Баатаҕай бары олохтоохторугар бөҕө, этэргэ дылы, алмаастыы доруобуйаны баҕарабын!
“Вести Верхоянья” хаһыат.
