Тардыллар үрүт (натяжные потолки) – аныгы дьиэҕэ саамай биһирэнэр, киэҥник биллэр тупсарыы биир көрүҥэ. Бүгүн биһиэхэ “All Pro” тардыллар үрүттэри туруорар хампаанньа хаһаайката Юлия Ларионова биисинэһин хайдах саҕалаабытын, биир суумка үстүрүмүөннээх сылдьан, хайдах тардыллар үрүт хас да көрүҥүн оҥорорго тиийэ үүммүтүн, тус бренд суолтатын, хамаанда оруолун туһунан үллэстэр.
Угуйук листовкалара уонна бастакы сакаас
Мин биисинэспин 2019 сыллаахха саҕалаабытым. Ити сыл тус урбаанньыт быһыытынан дьиҥ таһымнаахык бэлиэтэммитим. Ол эрээри, биһиги хампаанньабыт усутуоруйата арыый эрдэ, 2017 сыллаахтан, саҕаламмыта. Кэргэним табаарыһын кытары тардыллар үрүттэри оҥоруунан дьарыктаммыта. Ол сылдьан элбэххэ үөрэммитэ, табаарыһа үгүскэ такайбыта. Чааһынай маастар быһыытынан интэриниэккэ, социальнай ситимнэргэ биллэриилэри биэрэ-биэрэ, сакаастарга ылсаллар этэ. Ону таһынан, оччолорго олус тарҕаммыт угуйук ньыматын – килийиэннэри угуйар листовкалары тарҕатан – үгүстүк туһаммыппыт.
“Күлүккэ” сылдьан үлэлиир табыллыбатын, хайа да өттүнэн табыгаһа суоҕун өйдөөн, “All Pro” диэн бэйэбит тус бреммитинэн биэлиэтэммиппит. Онтубут биһиги өҥөбүтүн кэҥэтэргэ, үлэбит хаачыстыбатын тупсарарга төһүү буолбута.
Мин оччолорго оҕолонон дэкириэккэ олорор кэмим этэ, оҕобут биир да сааһын туола илигэ. “Азия” эргиэн киинигэр дьоҕус хостоох этибит, онтубутугар тардыллар үрүт шоурумун арыйбыппыт.
Биир суумка үстүрүмүөннээх
Дьыалабытын саҕалыырбытыгар хантан үп булан угабыт эҥин диэн боппуруос улаханнык турбатаҕа. Тоҕо диэтэххэ, өҥөнү оҥорорго сүрүн болҕомто үстүрүмүөннэргэ ууруллар. Аан бастаан саҕалыырбытыгар кэргэним син балай эмэ уруккуттан муспут үстүрүмүөннээх этэ. Оттон тиийбэтин – атыыласпыппыт. Онон наһаа элбэх харчыны бараабатахпыт. Биһиги биир суумка үстүрүмүөннээх дьыалабытын саҕалаабыппыт. Билигин онтубут дьааһыктарынан кыстанар, сороҕо массыынаҕа баппат үлүгэрэ. Оччолорго саамай улахан, сыаналаах үстүрүмүөннэрбит диэн пушка уонна гаас боллуона этэ.
Дьон баҕатын барытын учуоттаан
Биһиги килийиэннэрбитигэр тардыллар үрүт арааһын оҥоробут: судургуттан саҕалаан уустук оҥоһуулаахха тиийэ. Килийиэннэрбит баҕаларын барытын учуоттуубут: кинилэр бырайыактарыгар тугу уруһуйдаабыттарын, чертежтаабыттарын – барытын олоххо киллэриэхпитин сөп. Билигин тардыллар үрүт араас профиллара баар буоллулар, онон дьон араас баҕатын толорор кыах үөскээтэ. Килийиэн баҕатынан тута үлэлээбитинэн барабыт. Өскөтүн ханнык эмэ табаар тиийбэт буоллаҕына, ону биһиги бэйэбит сакаастаан аҕалтарабыт. Билигин таҥас үрүттэри (тканевые потолки) кытары тардар буоллубут, оттон оннук үрүтү киһи эрэ барыта уйунар кыаҕа суох – хас эмэ бүк үрдүк сыаналаах. Ханнык баҕарар өҥнөөҕү, моһуоннааҕы поставщик сыанатынан аҕалабыт. Тоҕо диэтэххэ, хас да хампаанньаны кытары быһаччы үлэлэһэр дилер буолабыт. Маны таһынан, профиллар дьиҥ таһымнаах дистрибьютордарабыт.
Тус бренд
Биисинэс үчүгэйдик сайдарыгар сүрүн оруолу тус бренд ылар. Биһиги түбэлтэбитигэр, хампаанньабытын кэргэним тус брендигэр олоҕуран таһаарбыппыт. Кини хара ааныттан бэйэтин репутациятыгар, аатыгар-суолугар олус кыһамньылаахтык, кичэллээхтик сыһыаннаспыта – сатабылын, идэтигэр бэриниилээҕин көрдөрбүтэ. Дьон анаан-минээн киниэхэ кэлэр, “чахчы, Миша бэйэтинэн туруоруо дуо?” диэн чопчулаһар буолбута.
Килийиэннэр ордук билэр киһилэригэр эрэнэллэр. Онон мин билигин бэйэм тус бреммэр үлэлэһэбин, саҥа этиилэргэ, кыахтарга мэлдьи аһаҕаспын. Киһи сылдьарын тухары үөрэниэхтээх эбит. Били “күн аайы эбиллибэт билии көҕүрүүр” диэн олус мындырдык эппиттэр эбит. Ол быһыытынан мин сотору-сотору араас сэминээрдэргэ, форумнарга, урбаанньыттары кытары нетворкиннарга сылдьабын, ол миэхэ бэйэм ааппын-суолбун тупсарарбар, сайыннарарбар көмөлөһөр. Дьону кытары алтыһыы, кэпсэтии, билсии тус – бренди бөҕөргөтөргө олус туһалаах.
Хамаанда туһунан
Хамаандабыт туһунан этэр буоллахха, биһиэхэ иккилии-үстүү сыл үлэлээн баран, атын эйгэҕэ көһөн, боруобаланан көрөн баран төттөрү төннүбүт үлэһиттэрдээхпит. Хара ааныттан биһигини кытары эрэллээхтик, тэҥҥэ саҕаласпыт дьоммут билигин да бааллар, уурайа сылдьан баран төннүбүппүт элбэх.
2019 сыллаахха кэргэним толкуйдаабыт логотиба уларыйбат. Логотиппыт “ALL PRO”, ол эбэтэр, “Все профессионально” диэн. Биһиги бэйэбит эйгэбитигэр буолар туох баар саҥа уларыйыыны, тенденцияны кыраҕатык кэтиибит, үөрэтэбит, сыллата форумнарга сылдьабыт. Быйылгы форумҥа 5 тыһ. кэриҥэ киһи кытынна: монтажниктартан саҕалаан биисинэс хаһаайыннарыгар тиийэ. Форум 3 күн устата барар, онно киһи үүнэригэр-сайдарыгар сөптөөх тэрээһиннэри булан ылар: поставщиктар быыстапкалара, сэминээрдэр, үөрэхтэр – барыта олус туһалаах уонна интэриэһинэй.
Маны таһынан, “Потолок пати” диэн олус интэриэһинэй тэрээһин ыытыллар, бу – “хаалтыһа”, хааччаҕа суох, көҥүл, формальнайа суох тэрээһин. Итиэннэ монтажниктар оскуолара диэн баар. Ити барыта биһиги дойдубутугар тардыы үрүт салаата күүскэ сайдарын туоһута. Атын дойдуларга оннук суох ээ.
Инники былааннар
Билигин саҥа аудиторияны тардарга үлэлэһэбит. Премиум-сегмены кытары үлэлиибит. Ол эрээри, биһиги өҥөбүтүн элбэх киһи туһанарыгар интэриэстээхпит.
Онуоха саҥа логотиптаах уонна ааттаах саайты үлэлэттибит. Онтубутугар сыана ырыынактааҕар удамыр. Нэдиэлэ иһигэр хайыы-үйэ бастакы килийиэннэрбититтэн сайаапкалары туттубут.
Уһуну-киэҥи толкуйдуу барбакка, хампаанньабытын судургутук “Потолочная компания” эбэтэр кылгатан “ПК” диэтибит. Логотибын оҥордубут, саҥа саайты үлэлэттибит.
Дмитрий Михайлов.
