Бу күннэргэ Ньурба улууһун Хатыҥ Сыһыы бөһүөлэгин олохтоохторо, элбэх оҕолоох Герман уонна Анегина Тобоновтар дьиэ кэргэннэрэ дойду бэрэсидьиэнэ Владимир Путин ыйааҕынан “Төрөппүт килбиэнэ” уордьанынан наҕараадаланнылар. Ол туһунан Айсен Николаев телеграм-ханаалыгар суруйар.
Тобоновтар – Ньурба улууһун Таркаайы нэһилиэгин Хатыҥ Сыһыы бөһүөлэгин биир бастыҥ, холобур буолар ыала. Германнаах Анегина 2005 с. сэтинньитигэр ыал буолбуттар, биэс оҕолоохтор. Килбиэннээх төрөппүттэр улахан болҕомтону оҕо доруобуйатыгар, үөрэҕэр, эт-хаан, өй-санаа уонна сиэр-майгы өттүнэн сайдыытыгар уураллар. Оҕолор бары үчүгэй үөрэхтээхтэр, оскуола, нэһилиэк олоҕор көхтөөхтүк кытталлар, уопсастыбанньыктар, үгүс күрэс кыайыылаахтара уонна лауреаттара.
“Маннык ыаллар биһиги уопсастыбабыт тирэҕэ буолаллар. Норуот духуобунай күүһэ бу курдук дьиэ кэргэннэргэ төрүүр, кэскиллээх олох итэҕэлэ күүһүрэр, дойду туһугар үлэлиир-хамсыыр, айар-тутар уонна кинини көмүскүүр гражданнар иитиллэн тахсаллар. Тобоновтары ис сүрэхпиттэн наҕараадаларынан эҕэрдэлиибин! Саха сирэ эһигинэн киэн туттар!” – диэн Айсен Николаев суруйбут.
Герман Степанович – 5-с эрэсэрээттээх, үрдүк таһымнаах сыбаарсык. Анегина Алексадровна – тапталлаах ийэ, иэримэ дьиэтин көрөн-истэн олорор далбар хотун. Кинилэр нэһилиэк, улуус уопсастыбаннай олоҕун көхтөөх кыттыылаахтара. Улахан кэтэх хаһаайыстыбалаахтар, оҕолоро үлэҕэ-хамнаска кыраларыттан үөрэммит үтүө дьон.
