Олунньу 5 күнүгэр эрэдээксийэ почтатыгар Росфинмониторингтан суостаах дьикти сурук (предписание) кэллэ. Бу тэрилтэ хоруупсуйаны, терроризмы үбүлээһини уонна масыанньыктары утары охсуһар, онон маннык тэрилтэ суругун соһуйа көрөҕүн. Суругу кэтиир тэрээһиннэр отделларын инспектора Катанова А.С диэн дьахтар илии баттаабыт. “Эһиэхэ сокуоннайа суох үбү туттуу баар курдук, онон олунньу 6 күнүгэр диэри ирдээбит докумуоннарбытын суһаллык ыытыҥ, бэрэбиэркэ бүттэҕинэ, быһаарыы ылыллыаҕа” диэн тимир-тамыр түмүктээх.
Гостэрилтэ эрээри тоҕо эрэ электроннай илии баттааһына суох, аны кинилэр суруктарын СДЭК диэн курьер тэрилтэтигэр төлөөн ылыахтааххын.
Дьиибэргээн Росфинмониторингтан “бу эһиги суруккут дуу, масыанньыктар дуу” диэн суругу ыытан ыйыттыбыт.
Росфинмониторинг юридическай управлениетын начаалынньыгын э.т. С.А. Хомутова олнньу 6 к. ыыппыт ыыппыт 01-01-67/3101 №-дээх эппиэтэ сарсыныгар кэллэ. Онно “ ааспыт сылтан маннык суруктары масыанньыктар ыытар буолбуттар, онон ити суруктартан куар-коду тел. киллэримэҥ, тус дааннайдаргытын ыытымаҥ, смс ылымаҥ, харчыны ыытымаҥ, масыанньыктааһыны уорбалаатаххытына Федеральнай нолуок сулууспатын 8-800-222-22-22 тел. эрийэн биллэриҥ” дэммит.
Былырыын РФ Социальнай пуондатыттан эрийэбит диэн кубулунан, Самара уобалаһыгар баар төлөпүөнтэн масыанньык эрийэ сылдьыбытын, пуондаларга ыыппытым да, “биһиги хайыыр да кыахпыт, билбэт тел ылымаҥ” диэн дьуһуурунай эппиэт ыыппыттара.
Оттон Росфинмониторинг үҥсүүнү СӨ ИДьМ ыыппыт. ИДьМ электроннай докумуоннар эргиирдэрин систиэмэтиттэн олунньу 9 к. 3/267703468883 №-дээх иһитиннэрии кэллэ.Онно “суруккутугар буруйу оҥоруу туһунан информация баарынан, буруйу оҥоруу, администаринай кэһии туһунан сайабылыанньалар Кинигэлэригэр 669-№-нэн киллэриннэ. Түмүгүн биллэриэхпит” диэбиттэр.
Кэлин биллибитинэн, хас да тэрилтэҕэ масыанньыктар Росфинмониторинг буолан кубулунан “предписание” ыыппыттар. Итиник улахан сулууспаларынан кубулунан албынныы сатыыр масыанньыктар чахчы сэрэхтээхтэр. Эһиэхэ ыыттахтарына, 8-800-222-22-22 төлөпүөнүнэн эрийэн, эбэтэр тустаах сулууспаҕа биллэриҥ. Масыанньыктар атахтарын анныгар сир умайар буоллаҕын эрэ тохтуохтара. Оттон бу “предписание” ыыппыт масыанньыктары туттубут диэтэхтэринэ, биллэриэхпит. Эһиги масыанньыктарга киирэн биэримэҥ.
Владимир Степанов.
