2026 с. саҕаланыаҕыттах Саха сиригэр 280 устудьуон кыыс хат буолбутунан уонна төрөөбүтүнэн сибээстээн босуобуйа оҥорторбут. Төлөбүрү босхо уонна төрөбүрдээххэ үөрэнэллэриттэн тутулуга суох, күнүскү үөрэх үөрэнэр устудьуоннар ылаллар. Харчыны Социальнай пуонда Саха сиринээҕи салаата ыытар.
Босуобуйа кээмэйэ үлэлиир-хамсыыр дьон тииһинэн олорууларарын алын кээмэйигэр тэҥнээх. 2026 с. бастакы зонаҕа (хотугу улуустар) – 36 471 солк., иккискэ – 30 549 солк. этэ.
Дэкириэт уоппускатын төлөбүрэ (барыта):
- 140 күн (көннөрү дэкириэт): 170 198 солк. (бастакы зона) / 142 562 солк. (иккис зона);
- 156 күн (ыараханнык оҕолонуу): 189 649 солк. (бастакы зона) / 158 855 солк. (иккис зона);
- 194 күн (игирэлэниигэ): 235 846 солк. (бастакы зона) / 197 550 солк. (иккис зона).
Харчы барыта биирдэ кэлэн түһэр. Көннөрү дэкириэт 140 күннээх буолар: төрүөх иннинэ 70 күн уонна төрөөбүт кэннэ эмиэ 70 күн. Оттон дьахтар оҕолоноругар моһуогуруох курдук эбэтэр игирэни төрөтөр буоллаҕына, дэкириэт уоппускатын 156 эбэтэр 194 күҥҥэ тиийэ уһатан биэрэллэр.
Дэкириэти оҥорторон төлөбүрү ыларга электроннай больничнай лиис уонна үөрэх кыһатыттан күнүскү үөрэххэ үөрэнэри туоһулуур ыспыраапка ирдэнэр. Ыспыраапкаҕа хат устудьуон ханнык күнтэн дэкириэккэ барара ыйыллыбыт буолуохтаах.
Сайабылыанньаны “Госуслуги” порталынан, Социальнай пуондаҕа эбэтэр МФЦ-га туталлар. Быһаарыы 10 күнүнэн тахсар. Харчы быһаарыы тахсыбытын кэннэ 5 эбэтэр сорох түгэҥҥэ 20 күн ининэн кэлэр.
Кыым.ру.
Хаарытска: bryansktoday.ru
