Саха сиригэр барыта 20 720 гаа иэннээх үс ойуур баһаарын умуллардылар. Баһаардар Үөһээ Бүлүү, Кэбээйи уонна Мииринэй сирдэригэр бааллара. Ол туһунан СӨ экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччыта Андрей Коноплев сырдатта.
Билигин баһаарынайдар Үөһээ Бүлүүгэ, Кэбээйигэ, Ньурбаҕа уонна Мииринэйгэ барыта 144 859 гаа иэннээх 8 баһаары умуллара сылдьаллар. Онно 235 киһи уонна 21 тиэхиньикэ үлэлиир. Оттон өрөспүүбүлүкэҕэ барыта баһаары утары 516 киһи уонна 38 тиэхиньикэ киирсэр.
Атырдьах ыйын 23 күнүнээҕи туругунан, өрөспүүбүлүкэҕэ уопсайа 1 049 114 гаа иэннээх 53 баһаар баар – Үөһээ Бүлүүгэ, Кэбээйигэ, Мииринэйгэ, Ньурбаҕа уонна Өлөөҥҥө.
Санаттахха, от ыйын 10 күнүттэн Саха сирин ойуурдарыгар эрэгийиэн таһымнаах ыксаллаах быһыы-майгы биллэриллэн турар. Улуус таһымнаах ЧС Мииринэйгэ, Өлөөҥҥө, Ньурбаҕа уонна Кэбээйигэ биллэриллибитэ.
