Билиҥҥи Арассыыйаҕа барыта холбоон 29,5 мөл. оҕо баар, онтон 449 тыһыынчата – тулаайахтар. Үгүстэрэ – арыгылаан төрөппүт бырааба былдьаммыт дьон уонна арыгыһыттар оҕолоро, тыыннаах тулааайахтар.
“Нужна помощь” пуонда суруйарынан, маннык оҕолор ахсааннара ордук Приморьеҕа, Красноярскай кыраайга элбэх. Бу тулаайах оҕолор ортолоругар “икки бүк тулаайахтар”, ол эбэтэр детдомтан ыалга иитиллэ ылыллан баран дэлби атаҕастанан, куһаҕан сыһыантан куотан детдомҥа иккистээн төннүбүт оҕолор, Москуба, Тула, Кемерово, Иркутскай уобаластарыгар элбэхтэр.
Пуонда үлэһиттэрэ бу ырытыыларын “биһиги тулаайахтар ахсааннарын эрэ аҕаллыбыт, бу көстүү үөскүүр социальнай төрүөттэрин ырыта барбатыбыт” дииллэр. Ону тэҥэ, “билигин детдомнарга бу этиллибиттээҕэр икки төгүл элбэх оҕо баар эрээри, эрэгийиэннэр ыстатыыстыка сыыппараларын буортулаамаары, дьиҥнээх ахсааны икки төгүл көҕүрэтэллэр” үһү.
