Хаҥалас улууһун Покровскайыгар үс мэндиэмэннээх, киэҥ-куоҥ, сылаас, олус тупсаҕай тутуулаах саҥа оскуола үлэҕэ киирэн, үлэ-үөрэх күөстүү оргуйар.
2016 сыллаахха саҕаламмыт тутуу түмүктэнэн, аныгы үйэ бары ирдэбиллэригэр толору эппиэттиир саҥа оскуола, Покровскай олохтоохторугар дьоһун бэлэх буолла. Олохтоохтор саҥа оскуола тутулларын 80-с сыллартан быһа туруорсубуттар. Күн өҥө дьүһүннээх саҥа объект куорат биир саамай тупсаҕай тутуута буолан, олохтоохтор харахтарын үөрдэр, билии киэҥ аартыгар ыҥырар.
Оскуоланы тутууга генеральнай бэдэрээтчит “Якутцемент”, бырайыактааччы “Газстройпроект” тэрилтэлэр үлэлээтилэр. Сыаната 308 790 705,21 солк. тэҥнэспит.
Оскуола уопсай иэнэ 6000 кв.м. тахса. Тастан киирии кирилиэстэн саҕалаан оскуола оҕо-аймах, дьон-сэргэ туһугар оҥоһуллубута тута харахха быраҕыллар. Ол курдук, таһынааҕы кирилиэс халтараан кэмҥэ дьон эчэйбэтин туһугар анаан оҥоһуллубут. Оскуола иннэ ураһа быһыылааҕа сонуннук уонна уратытык көстөр. Иһинээҕи дизайнын “Уран” фирма өҥүн-дьүһүнүн табатык талан олус да кэрэ, киһи эрэ үөрэниэх, сайдыах баҕатын уһугуннарар эйгэтин олохтообут.
Кылаастар иэннэрэ 70-100 кв.м. Төһө баҕар элбэх оҕолоох кылаас бэйэ-бэйэҕэ мэһэйдэспэккэ холкутук үөрэнэр кыахтаахтаммыт.
Химия, биология, физика кылаастарыгар, араас уопуттары оҥорорго аналлаах тэриллэр хас паарта аайы оҥоһуллубуттар.
Омук тылын уонна информатика кылаастарыгар паарта аайы көмпүүтэр, наушник туруоруллубут. Паарталары, олоппостору оҕо бэйэтигэр сөптөөх гына уһатан, кыччатан биэриэн сөп.
Ону таһынан, хас биирдии кылааска интерактивнай уонна миэл дуоскалара ыйаммыттар.
Үлэ уруогун кылаастара олус сөхтөрдүлэр. Кыргыттар кылаастарыгар иистэнэр массыыналар, таҥас өтүүктүүр остуоллар, ас астыыр оһох кытары баар. Кыыс оҕо оскуола эрдэхтэн иэримэ дьиэни иччилиир хаһаайка бэрдэ буолан тахсарыгар бары усулуобуйаны тэрийбиттэрэ кэрэхсэбиллээх.
Оттон уолаттар кылаастарыгар уһанарга аналлаах инструмент эгэлгэтэ. Маһынан хоппо, таҥас ыйыыр оҥорбуттарын оскуола дириэктэрэ киэн тутта кэпсиир.
Спортзал эмиэ оҕо эт-хаан өттүнэн сайдыылаах, чөл олохтоох буоларыгар бары өттүнэн толору хааччыллыбыт. Мааттар, инвентарь арааһа киһи эрэ сүүрүөх-көтүөх, мэниктиэх санаата киирэр.
Уларыттар сиргэ хас биирдии оҕоҕо кабинкалаах, суунар, киирэн тахсар сир киэҥэ-куоҥа, ырааһа киһини сөхтөрөр.
Аактабай зал тыйаатыр курдук диэтэхпинэ омуннааһын буолбата буолуо. Улахан сыана, сымнаҕас кириэһилэлэр, курустаал люстра... Кириэһилэлэри хайдах баҕар сыҕарытыахха сөп. Зал үрдэ сахалыы оһуорунан, уотунан-күөһүнэн киэргэтиллибит. Киһи тыйаатырга сылдьар курдук сананар. "Бу Алиш Забидович Мамедов бэлэҕэ" диэн, киэн тутта, махтана кэпсииллэр.
Остолобуойга тус туһунан эт, балык сыахтара, оҕуруот аһын уурар сир уонна астыырга туттуллар тэрил барыта баар.
Доруобуйаларыгар хааччахтаах оҕолорго лифт үлэлиир.
Оскуола иһигэр уоту харыстыырга аналлаах систиэмэ турар. Бу көмөтүнэн хоммунальнай төлөбүрдэр биллэ кыччыахтара диэн сабаҕалыыллар.
Оскуола дириэктэрэ Владислав Владимирович Капитонов номнуо ахсыс сылын дириэктэринэн үлэлиир, кини оскуола үлэтин-хамнаһын туһунан маннык кэпсиир: “Биһиги оскуолабыт улуус биир саамай улахан оскуолата буолар. Бу саҥа оскуола киириэҕиттэн икки сменаттан биир сменаҕа көстүбүт. Билигин 500 тахса оҕо үөрэнэр. 118 үлэһит, олортон 30-ка техүлэһиттэр уоннааҕылара учууталлар. 50% үрдүк категориялаах учууталлар үлэлииллэр. Онон ЕГЭ түмүгүнэн улуус үрдүнэн бастакы көрдөрүүлээхпит. Оҕолорбут сыл аайы Арассыыйа, өрөспүүбүлүкэ таһымнаах араас конференцияларга ситиһиилээхтик кытталлар. Доруобуйаларыгар хааччахтаах оҕолорбутугар дистанционнай үөрэхтээһини ыытабыт. Оҕо бары өттүнэн сайдыылаах буоларын туһугар араас хайысханан үлэлэһэ сатыыбыт. Эбии үөрэхтээһин өттүнэн IT технология, робот оҥоруута, туойунан охсуу, спорт өттүнэн араас секциялар үлэлииллэр. 2014, 2016 сылларга “Арассыыйа бастыҥ оскуолата” лауреат буолбуппут. Мантан инньэ саҥа оскуолаҕа бары күүһү-уоҕу ууран үлэлиир кыах уонна баҕа баар. Онон инникитин сыалбыт-сорукпут олус элбэх”.
