Саха сирин бырабыыталыстыбатыгар улуустар сыыппара телевидениетыгар көһүүлэрин бэрэбиэркэлээтилэр.
Улуустар саҥа сыыппара телевидениетыгар көһүүлэрин бүгүн видеонконференц сибээс көмөтүнэн буолбут мунньахха вице-премьер Кирилл Бычков бэрэбиэркэлээтэ.
Кэлэр нэдиэлэлэргэ олохтоох бэйэни салайыныы уорганнара нэһилиэнньэлээх пууннарга тэлэбиисэргэ холбонор сыыппара приставкалара атыыга баалларын суоҕун кэтээн көрүөхтэрэ. Сыыппара телевидениета дойду үрдүнэн DVB-T2 стандартка олоҕуран көстүөҕэ.
Маны таһынан, бастатан туран, нэһилиэнньэ кыаммат араҥата “Орион” уонна “НТВ-ПЛЮС” спутниковай телевидение эпэрээтэрдэрин приставкаларын атыылаһар кыахтарын быһааралларыгар эттилэр. Маныаха эрэгийиэн уонна муниципальнай таһымҥа көмөнү оҥорор механизмнары үөрэтиэххэ наада диэн эттилэр.
Кирилл Бычков инновация, сыыпара сайдыытын уонна инфокоммуникационнай технология министиэристибэтигэр миэстэтигэр баар кыһалҕаны быһаарарга сорудахтаата.
Санатар буоллахха, эһиилгиттэн саҕалаан дойду үрдүнэн федеральнай каналлар эфирдэрин субсидиялааһын түмүктэнэринэн, каналлары араарыы буолуоҕа. Инньэ гынан, сыыппара телевидениета бары ыалга баар буолуохтаах.
Инновация министиэристибэтэ этэринэн, сыыппара телевидениетынан 390 нэһилиэнньэлээх пуун хабыллыаҕа (95%). Олорго сыыппара хаачыстыбатынан 10 канал көстөр буолуоҕа, оттон сыл бүтүүтэ 20 канал көстүөҕэ. Оттон хабыллыбакка хаалбыт нэһилиэнньэлээх пууннарга спутник телевидениетын босхо көрдөрөр буолуоҕа. Эһиилги сылга бырабыыталыстыба “Саха” НКИК ханаалын субсидиялыыры оннунан хаалларбыта, инньэ гынан, НКИК ханаалын боростуой антенанан көрөр кыахтаныахпыт.
