Сэтинньи 22 күнүгэр “Саха гимназияҕа” оҕону ааҕыыга хайдах угуйабыт, ханнык ньымалар, албастар баалларый диэн тиэмэҕэ төрөппүт улахан мунньаҕа буолан ааста. Кэпсэтиини инновация миниистирин солбуйааччы Чокуур Гаврильев сүрүннээн ыытта. Ыҥырыылаах ыалдьыт быһыытынан “Бэлэм буол+”, “Хатан”, “Кэскил”, “Чуораанчык” оҕо хаһыаттара, сурунааллара кэлэн санааларын эттилэр.
“Саха гимназияҕа” “Төрөппүт – төрөппүккэ” диэн бырайыактара үлэлээбитэ хас да сыл буолбут. Бу сырыыга оҕо бэчээтигэр, оҕо ааҕыытыгар болҕомтолорун уурбуттар. Сүрүн санаа быһыытынан дьиэ кэргэн барыта холобур буолан оҕону ааҕарга үөрэтэр, оҕо сааһынан наардаммыт хаһыат, сурунаал баара буоллар диэн эттилэр.
Эрэдээксийэлэр “сурутуу хампаанньатын өйөөҥ, кэпсээҥ, дьиэ кэргэн бүддьүөтүгэр оҕо бэчээтигэр уонна уус-уран кинигэҕэ үбү-харчыны анаан-минээн көрүөхтээх, оҕото сахалыы ааҕан улаатарыгар төрөппүт эмиэ бэйэтин кылаатын киллэриэхтээх, кэнэҕэһин сахалыы тылынан тахсар оҕо бэчээтэ инновация быһыытынан сайдыа, умнууга хаалыа суоҕа” диэн эрэл санаанан тэрээһин түмүктэннэ.
Е. Николаев,
“Хатан” сурунаал сүрүн эрэдээктэрэ
