ХИФУ устудьуоннара уонна преподавателлэрэ Тимофей Захаров-Чээбий «Ала Булкун бухатыыр» олоҥхотун саҥа таһаарыытын сүрэхтээтилэр. Манна научнай ыстатыйалар, ырытыылар уонна нууччалыы тылбааһа киирдилэр.
“Тимофей Захаров-Чээбий – уһулуччулаах олоҥхоһут, кини талаанын, тыла-өһө баайын олоҥхону үөрэтээччилэр үрдүктүк сыаналыыллар. Нууччалыы тылбааһын “Мир перевода” диэн научнай куруһуокпар дьарыктанар устудьуоннар толордулар”, – диэн РФ Хотугу-Илин норуоттар тылларын уонна култуураларын Институтун доцена Ирина Собакина кэпсиир.
Кини олоҥхону тылбаастааһын номнуо иккис улахан бырайыак буоларын бэлиэтээтэ. “Олус ыарахан эрээри интэриэһинэй үлэ. Олоҥхону тылбаастыах иннинэ устудьуоннар элбэх литератураны хасыһан үөрэппиттэрэ, үгүс семинардарга сылдьыбыттара. Кинилэр идэлэринэн үөрүйэхтэнэллэрин туһугар, кафедра маннык бырайыактарга сыһыарыы үлэтин ыытар. Бу үлэлэр кэлин бэчээттэнэн тахсаллар”, – диэн билиһиннэрдэ.
Саҥа таһаарыы Амма улууһун администрациятын үлэҕинэн оҥоһулунна. Бырайыакка Василий Илларионов салайааччылаах университет преподавателлэрэ эмиэ үлэлэстилэр.
