Ахсынньы 13-14 күннэригэр – Удачнайга, салгыы ахсынньы 15 күнүгэр - Мииринэйгэ, «Юбилейнай” атыы киинин ахсыс павильонугар, номнуо үгэскэ кубулуйбут “Алмаастаах түөлбэ” атыы-эргиэн быыстапката ыытыллыаҕа.
Бу дьоhуннаах тэрээhин Саха сирин тыатын хаhаайыстыбатын министиэристибэтин, «АЛРОСА» «Профалмаас» профсойууhун, Мииринэй оройуонун дьаhалтатын тыа хаһаайыстыбаҕа управлениетын, «Ситим» медиа-бөлөх кыттыыларынан ыытыллара былааннанар.
Миэхэ Мииринэй оройуонун дьаһалтатын тыа хаһаайыстыбатын управлениетыттан биллэрбиттэринэн, атыы-эргиэн дьаарбаҥкатыгар кэлэн кыттыыны ыларга номнуо сөбүлэҥ биэрбиттэр.
Мииринэйтэн 60 көс ыраах сытар Бүлүү улууһун «Сыа Бүлүү» тыа хаһаайыстыбатын кээпэрэтиибэ. Ньурбалар уонна үөһээ-бүлүүлэр өттүлэриттэн, сайаапка барбытын үрдүнэн туох да биллэрии билиҥҥитэ суох. Маны таһынан, Дьокуускайтан олохтоох аһы-үөлү бэлэмниир тэрилтэлэр эмиэ кыттыыны ылаллар.
Куруук буоларын курдук, Сунтаар улууһуттан СХПКлар кыттыыны ылаллара былааннанар.Олор истэригэр «Тускул»(Күндэйэ), «Тэрис»(Аллыҥа), «Күүкэй»(Күүкэй), «Кириэстээх» СХПКлар, Бордоҥ уонна Арыылаах(Уһун-Күөл агрооскуолалара) бааллар.
Ол эрэн, бу быыстапкаҕа кыттыахтаах тэрилтэлэри, уматык биллэ ыараабытын кыһалҕата, томороон тымныы туран, бары сүүс бырыһыан кэлэллэрин мэктиэлээбэт. Тыа дьонун эмиэ өйдүөххэ наада.
Тыа дьоно барахсаттар, улгумнара, истигэннэрэ бэрт буолан, төһө да барыыһа суох буоллар, Мииринэйгэ кэлэн атыы-тутуу бөҕөтүн тардан, сүрдээҕин сэргэхситэн бараччылар.
Бу – дьиҥ-чахчы бырааһынньык! Онон, алмаастаах кыраай киинигэр сыалаах эт, быластаах арыы, дьэдьэн, чохоон атыыга сотору тахсарын олус күүтэбит.
Станислав Алексеев, Мииринэй к. Аааспыт дьаарбаҥкалартан ааптар хаартыскалара.
