Ахсынньы 20 күнүгэр “Ситим” медиа-бөлөх 15 сылын бэлиэтиир тэрээһин буолан ааста. Манна суруналыыстар уопсастыбаларын, өрөспүүбүлүкэ бырабыыталыстыбатын, парламент уонна министиэристибэлэр бэрэстэбиитэллэрэ уонна “Ситим” медиа-бөлөх доҕотторо кыттыыны ыллылар.
“Ситим” медиа-бөлөх 2003 сыллаахха тэриллибитэ. Билигин дойду Хотугу-Илиҥҥи масс-медиа ырыынагын биир ордук бөдөҥ тэрилтэтэ буолар. Ол курдук, түөрт хаһыаты: “Кыым”, “Спорт Якутии”, “Ваше право. Дальний Восток”, “Бэлэм буол+”; биэс сурунаалы: “Хатан”, “Күрүлгэн”, “Байдам” уонна “Якутия”, “Полярные Авиалинии” бортовой сурунааллары таһаарар. Ону таһынан, “Якутия24”, “Кыым.ру” уонна англия, кытай тылларынан “Yakutia Today” саайтары үлэлэтэр.
“Ситим” бөлөх тэриллиэҕиттэн генеральнай дириэктэр Мария Христофорова, 90-с сылларга үбүлээһин тиийбэтиттэн сабыллыбыт хаһыаттары сөргүтэр соруктаах үлэтин саҕалаабыта. Ол курдук, 1958 сыллаахха тэриллибит “Молодежь Якутии” хаһыат 2003 сыллаахха саҥалыы тыыннанан тахсыбыта.
Оттон 2005 сылтан “Кыым” хаһыат тахсар буолбута. Аан бастакы нүөмэрэ 1921 сыллаахха ахсынньыга тахсыбыта. Билигин “Кыым” өрөспүүбүлүкэ үрдүнэн сахалыы тылынан тахсар ордук элбэх тиражтаах (25 тыһ экз) хаһыатынан биллэр.
Бу күҥҥэ өрөспүүбүлкэ үрдүнэн “Ситим” таһаарыыларын уопсай тирааһа 45 % ылар.
“Ситим” медиа-бөлөх ситиһиилэрэ
“Ситим” МБ 2011 сыллаахха “Хомус (варган) аан дойду култууратын эйгэтигэр” бырайыагын иһин, Арассыыйа “Үрүҥ көмүс охчут” (“Серебряный Лучник”) национальнай бириэмийэтин дипломана.
“Ситим” таһаарыылара РФ Тиражка национальнай сулууспатын “Тираж – сыл рекорда” бириэмийэтин лауреаттара буолбуттара: “Кыым” (2009, 2015 сс.), “Спорт Якутии” (2011, 2012, 2013 сс.), “Хатан” уонна “Күрүлгэн” (2010, 2011, 2012, 2013, 2014 сс.).
2013 с. “Ситим” МБ “Оһуокай синергията аан дойду култууратын эйгэтигэр” бырайыагын иһин, РФ “Үрүҥ көмүс охчут” (“Серебряный лучник”) национальнай бириэмийэтин дипломана.
2015 с. түмүгүнэн “Хатан” сурунаал Арассыыйаҕа “Атыынан тарҕаныы бастыҥа” (“Лидер продаж”) бириэмийэтин лауреата буолбута.
2015 сыл түмүгүнэн “Кыым”, дойду 10 бастыҥ хаһыатын кэккэтигэр киирэн, “Национальнай пресса” бириэмийэ лауреата буолбута.
2016 сыл бастакы аҥаарын туругунан, “Кыым”, “Күрүлгэн”, “Байдам” Арассыыйа “Сурутуунан тарҕаныы бастыҥа” бириэмийэтин лауреаттара буолбуттара.
СӨ Суруналыыстарын сойууһун куонкуруһугар “Кыым” хаһыат 2008, 2015 сс. “Сыл хаһыата” үрдүк ааты ылбыта.
“Кыым” быһаччы кыттыытынан Гиннесс рекортара олохтоммуттара: Хомус, Оһуокай, Кымыс, Саха таҥаһа.
