ХИФУ “Сэргэлээх уоттара” култуура киинигэр сылын аайы ыытыллар үлэ дьаарбаҥката тэрилиннэ. Манна Дьокуускай куораттан уонна 30 улуустан уопсайа 100 тахса тэрилтэлэр уонна хампаанньалар кыттыыны ылаллар.
Быйыл ХИФУ 3300 оҕо бүтэрэр. Бу сыл саҥата үөрэхтэрин бүтэрээри сылдьар устудьуоннар улуустар салалталарын кытта көрсөн, тыа сиригэр баар үлэ миэстэлэрин билсибиттэрэ. Бу тэрээһин түмүгүнэн үгүс устудьуоннар ханна үлэлии баралларын быһаарыммыттар. Бу туһунан ХИФУ гуманитарнай хайысхаҕа уонна корпоративнай политикаҕа проректора Надежда Зайкова иһитиннэрэр.
СӨ үлэлээх буолуу судаарыстыбаннай кэмитиэтин бэрэссэдээтэлин солбуйааччы Гаврил Харлампьев этэринэн, сыл аайы 9800 оҕо үөрэҕин бүтэрэр. “Өрөспүүбүлүкэ үрдүнэн сылын аайы 52% үөрэхтэрин бүтэрбит оҕолор үлэ көрдөнөллөр. Үлэнэн хааччыллыы 92% буолар. Идэҕитинэн үлэ булан өрөспүүбүлүкэни сайыннарар исписэлиистэр буолуоххут диэн эрэнэбин”, — диэн Харлампьев эттэ. Тэрийээччилэр кэтээн көрүүлэринэн ордук педагогическай хайысхаҕа үлэ көрдүүллэр. Манна 2019-2020 сылларга 885 үлэ миэстэтэ тахсыбыт.
