“Иккис Украинан” аатырар Өлүөхүмэ улууһун Үҥкүр ферматыгар быйыл сүөһү төрүөҕэ үчүгэй. “Кладовая Олекмы” ХЭУо зоотехнига С.Ф. Слепцова уонна эдэр осеменатор-тиэхиньик Роман Мамонтов кыһамньылаах үлэлэринэн, хаһааҥҥытааҕар да ынах эрдэ төрөөһүнэ ситиһилиннэ.
Ол курдук, олунньу 21 күнүгэр Үҥкүр ферматыгар 60% ынах төрөөтө. Эрдэ төрөөбүт ынах бары өттүнэн үчүгэй – ньирэйдэр түргэнник ситэллэр, ынахтар саас эрдэлээн өлгөм үүтү биэрэн саҕалыыллар.
Уопуттаах ыанньыксыт Людмила Федоровна Нутчина 43 ынаҕы көрөрүттэн номнуо 23-һэ төрөөбүт. Ньирэйдэри А.В. Давыдова уонна Г.Н.Габышева көрөллөр. Ньирэйдэргэ ыаммыт үүккэ эбии бороһуок үүтү булкуйан иһэрдэллэр. Саҥа төрөөбүт нбирэйи уонча күн “дьааһылаҕа” көрөн баран салгыы атын сиргэ туталлар.
Төрөөбүт ынахтарга күнүскү аһылыктарыгар 10 кг оту, 15 кг сиилэһи, 5 кг сенаһы уонна 3 кг комбикорму сиэтэллэр. Инньэ гынан. Ынахтар күннэтэ 1600 кг үүтү биэрэллэр. Ити былырыыҥҥыттан икки төгүл элбэх.
Үҥкүр ферматыгар ыанньыксыттар Л.Копылова, Л.Давыдова, В. Архангельская эмиэ олус кыһамньылаахтык үлэлииллэр. Маны таһынан С. Габышев, Ю.Былков, Г.Васильев күннэтэ хороҕор муостааҕы харайыыга сыраларын ууралар. Кэллэктиип олус иллээх, былааны толорууга хоннохтоохътук ылсаллар.