Ньурба улууһун сиригэр-уотугар Марха өрүс күргэтин тутуута 2015 сыллаахха саҕаламмыта. Бу – Уһук Хоту сиргэ дэҥҥэ көстөр, Саха сиригэр бастакы баараҕай бырайыак быһыытынан биллэр.
Марха күргэтин тутуу салҕанар. Алтыс тирээбилтэн бэһискэ конструкцияны тэлгэтии үөрүүлээх түгэнигэр “Бүлүү” федеральнай суол управлениетын салайааччы Николай Иванович Андреев, кылаабынай инженер Александр Владимирович Дерес, “Сибмост” хампаанньа бэрэсидьиэнэ Евгений Иванович Раков, “Сибирский мост” 7 №-дээх күргэ тутааччы этэрээтин филиалын тутуу инженердэрэ, күргэ тутааччылара, “РИК Автодор” АУО кыттыыны ыллылар. Конструкцияны сыҕарытыы тэрээһинэ буолуон иннинэ Алиса Михайловна Иннокентьева алгыс оҥордо.
Күргэ уопсайа 560 погоннай миэтэрэ усталаах, 4000 тахса туонналаах тимир конструкция ыараханы көтөхтөрөр оҥоһугунан (лебедка), механизмынан тэлгэниэхтээх. Сууккаҕа 120 миэтэрэ, 21 миэтэрэ күргэ конструкцията сыҕарыйар. Тимир конструкция Улан Удэҕэ “Дальмост” собуокка таҥыллан, оҥоһуллан тимир суолунан Алын Бэстээххэ диэри, салгыы сиринэн 2000 туонна курдук миэстэтигэр тиэллэн кэлбит.
Быйыл алтынньы ый бүтүүтүгэр күргэни үлэҕэ киллэрэргэ былаанныылларын туһунан “Бүлүү” федеральнай суол управлениетын салайааччы Николай Иванович Андреев этэр: “Үлэ аҥара ыытылынна. Күргэ алта тирээбиллээх, иккитэ биэрэк кытыытыгар, түөрдэ өрүс сүнньүгэр бааллар. Салгыы 2-3 тирээбиллэр ситэриллиэхтээхтэр, үһүс тирээбил халаан уута тахсыар диэри үлэтэ бүтүөхтээх, иккиһин сайыҥҥы өттүгэр бүтэрэри былаанныыбыт. Уопсайа 560 м усталаах, Ньурба өттүттэн 4 км, Дьокуускай өттүттэн 2 км суол үһүс категориянан аспаалланыахтаах”.
“РИК Автодор” АУО генеральнай дириэктэрин 1-кы солбуйааччы Сергей Валерьевич Никифоров иллэрээ сыллаахтан өрүс уҥуоргу, Маар өттүгэр хаҥас биэрэк киирии өттүгэр 200-тэн тахса кубометр буор кутан, откуоһу бөҕөргөтүү үлэ ыытыллыбытын эттэ. Билигин Түүкээн үрэххэ күргэ тутуута саҕаланан, буор кутуутун үлэтэ ыытылларын туһунан, күргэ 2020 сылга үлэҕэ киириэхтээҕин кылгастык билиһиннэрдэ.
Антонина СЕМЕНОВА.
