Муус устар 6 күнүгэр Мархаҕа “Пульс” диэн сынньатар-чэбдигирдэр кииҥҥэ, “JUNIOR Kids 3+” диэн үстэриттэн үөһэ саастаах оҕолорго аналлаах устуудьуйа үөрүүлээх аһыллыыта буолан ааста.
Манна “Окружной центр народного творчества” тэрилтэ дириэктэрин солбуйааччы Нюргуяна Ушницкая, култуура салалтатын исписэлииһэ Анна Каженкина, “Пульс” сынньатар-чэбдигирдэр киин дириэктэрэ Анастасия Кычкина, “Пульсики” ырыа ансаамбылын солистара, төрөппүттэр, оҕолор уод.а. кыттыны ыллылар.
Оҕолор аныгы миэбэлинэн, оонньуур тэрилинэн хааччыллыбыт устуудьуйаны олус астыннылар, аниматоры кытта дуоһуйа оонньоотулар. “JUNIOR” диэн оҕо айар, инновационнай устуудьуйата үлэлээбитэ номнуо биир сылтан орто. Билигин икки бөлөҕүнэн дьарыктары ыыталлар. Ол курдук, оскуола иннинээҕи саастаах уонна оскуолаҕа үөрэнэр оҕолорго.
Бу сыл күһүнүттэн “Марха түөлбэтин доруобуйаларыгар хааччахтаах оҕолорго аналлаах научнай холоон көрүүлэри оҥорор кылаас” аһыллара былааннанар. Бу бырайыак “Норуот бүддьүөтэ-2018” бырагыраамманан 270 тыһ солк грант сүүйбүтэ.
Санатар буоллахха, ааспыт сыл түмүгүнэн “Инновации в культуре. От идеи к реализации” диэн куоҥкуруска инновационнай бырайыактар ортолоругар гран-при аатын ылан 100 тыһ солк суумалаах сэртипикээтинэн наҕараадаламмыттара. Бу харчынан саҥа устуудьуйа өрөмүөнэ оҥоһулунна, аныгы тэрилинэн хааччылынна.
Лена Сорокина, “JUNIOR” устуудьуйа салайааччыта.
