Үөһээ Бүлүү улууһугар “бронхопневмония” диагнозтаах 30-ча оҕо балыыһаҕа киирбит. Бу туһунан улуустааҕы киин балыыһа “Якутия 24” ханаалга иһитиннэрбит.
Үөһээ Бүлүүтээҕи киин балыыһа сүрүн бырааһы солбуйааччы Туяра Павлова маннык кэпсиир: “Балыыһаҕа 30-ча оҕо киирдэ. Олортон улахан аҥаара „бронхопневмония“ диэн диагнозтаахтар. Оҕолор туруктара этэҥҥэ. Бу сыстыганнаах ыарыы буолбатах. Үксүн тымныйыы кэнниттэн ыалдьаллар”.
Улуустааҕы үөрэх салалтатын начаалынньыга Спиридон Борбуев муус устар 28 күнүгэр “Facebook” социальнай ситимҥэ, Хоро нэһилиэгин оскуолатыгар уонна уһуйааныгар харантыын биллэриллибитин туһунан таһаарбыт. Харантыын биир эрэ нэһилиэккэ биллэрилиннэ диэн суруйбут.
