От ыйын 31 күнүттэн “ипотека каникула” диэн сокуон олоххо киирдэ. Муус устар 18 күнүгэр Госдума бигэргэппит докумуонун быһыытынан, ипотека кирэдьиитин ылбыт киһи баантан сыл аҥаарыттан элбэҕэ суох льготалаах кэминэн туһаныан сөп. Бу кэм устата кирэдьиитин төлөбүрүн кыччатар эбэтэр тохтотор кыахтаах.
Ипотека каникулугар үс усулуобуйаҕа эппиэттиир дуогабардар киирэллэр. Ол курдук, дуогабар балаһыанньата эрдэ уларыйбатах, ипотеканан ылыллыбыт дьиэ биир эрэ буоллаҕына уонна кирэдьииттээх киһи олох ыарахан кэмигэр түбэстэҕинэ.
Докумуоҥҥа олох ыарахан кэмигэр түбэһиигэ биэс киритиэрийдээх. Бастакынан, үлэтэ суохтарга туруу, I уонна II группалаах инбэлииттэр, икки ыйтан ордук кэмҥэ үлэлиир кыаҕа суох буолбут, дохуоттара 30% түспүт дьон. Онуоха ипотека төлөбүрүн ыйдааҕы орто кээмэйэ дохуот ыйдааҕы орто кээмэйиттэн 50 % үрдүк буолуохтаах.
Ону таһынан, иитэр дьоно элбээбит (сокуоннай саастарын ситэ илик оҕолор эбэтэр I, II группалаах инбэлииттэр) дьон туһаныахтарын сөп. Ол эрэн, дохуоттара холбоон 20% түспүт, оттон ипотека төлөбүрэ ыйдааҕы орто дохуоттан 40% үрдээбит буоллаҕына.
Сокуоҥҥа бырабыыталыстыба кирэдьиит муҥутуур үрдүк кээмэйин быһаарыахтаах диэн суруллар. Бу эрэгийиэннэргэ туһунан буолуон сөп. Онуоха бырабыыталыстыба муҥутуур таһымы олохтуу илигинэ таһым кээмэйэ 15 мөл солк элбэҕэ суох диэн турар.
Билигин ипотека дуогабардарыгар бастакы сирэйгэ, кирэдьиит ылбыт киһи үөһэ ыйыллыбыт усулуобуйалары толордоҕуна ипотека каникулунан туһанар бырааптааҕын туһунан суруллуохтаах. Кирэдьиит устуоруйатыгар ипотека каникулунан туһаммытын туһунан иһитиннэрии суох буолуохтаах.
Бу сокуоҥҥа эрдэ ылыллыбыт ипотека кирэдьииттэрэ эмиэ киирэллэр.
Ону таһынан, атырдьах ыйын 1 күнүттэн РФ бэрэсидьиэнин ыйааҕа күүһүгэр киирэр. Ол курдук, ипотека каникулунан туһаммыт дьон НДФЛ нолуогуттан уонна реестргэ уларытыылары киллэриигэ төлөнөр 200 солк госпошлинаттан босхолоноллор.
