Алтынньы 23 күнүгэр хаарбах туруктаах уонна баһаартан эмсэҕэлээбит дьиэлэр олохтоохторугар, Лермонтов уулуссатын 26/1 дьиэтигэр баар саҥа кыбартыыралар күлүүстэрин туттардылар.
Үөрүүлээх тэрээһиҥҥэ куорат баһылыга Сардана Авксентьева, куорат Думатын бэрэссэдээтэлэ Альберт Семенов, “Агентство по развитию территорий” тэрилтэ генеральнай дириэктэрэ Владислав Федоров, куорат Думатын дьокутааттара, уопсастыбаннас уонна олохтоохтор кыттыыны ыллылар.
Мээрийэ пресс-сулууспата иһитиннэрбитинэн, 12 олохтоох саҥа кыбартыыралар күлүүстэрин ылбыттар. Толору хааччыллыылаах дьиэни “Агентство по развитию территорий” диэн муниципальнай тутааччы дьэндэппит. Кыбартыыралар “под ключ” оҥоһуулаахтар. Санатар буоллахха, “2018-2022 сс “Дьокуускай куорат” куораттааҕы уокурук нэһилиэнньэтин дьиэнэн хааччыйыы” муниципальнай бырагыраамма үлэлиир.
“Хас биирдии киһиэхэ бас билэр дьиэлээх-уоттаах буолара олус суолталаах. Бу 32 кыбартыыралаах дьиэни ааспыт сылтан тутан саҕалаабыппыт. Номнуо биир сылынан тутуу түмүктэннэ. Саҥа дьиэ куорат бүддьүөтүттэн тутулунна. Биһиги бу бырагыраамманы салҕыы үлэлэтэр туһунан сыал-сорук туруорабыт”, – диэн баһылык Сардана Авксентьева эттэ.
Кини Дьокуускайга 167 дьиэ, 2017 сылга диэри үлэлээбит хаарбах дьиэлэртэн көһөрүү федеральнай бырагыраамма иккис түһүмэҕэр көһөрүллүбүтүн бэлиэтээтэ. Ааспыт сыл балаҕан ыйыттан 376 дьиэ хаарбах туруктааҕынан ааҕыллыбыт. Бу дьиэлэр олохтоохторо бырагыраамма үһүс түһүмэҕэр киирэр кыахтаахтар.
“Бу сылга хаарбах туруктаах дьиэлэр 189 олохтооҕун саҥа дьиэнэн хааччыйыахтаахпыт. Куораппыт сыл аайы тупсан иһэр. Дьон олороругар табыгастаах усулуобуйа оҥоһуллаллар. Онон куорат олохтоохторо толору хааччыллыылаах дьиэлэргэ олороллоро суолталаах”, — диэн Дьокуускай куораттааҕы Дума бэрэссэдээтэлэ Альберт Семенов эттэ.
Саҥа дьиэ хаһаайыттарын аатыттан Свердлов уулуссатын 18/1 баар хаарбах дьиэҕэ олорбут Галина Соловьева махтал тылын эттэ: “Биһиги үчүгэй усулуобуйалаах дьиэҕэ олорботохпут. Ол эрэн, барыта табыллыа диэммит эрэнэр этибит. Баҕа санаабыт туолан саҥа дьиэҕэ киирбиппититтэн олус үөрэбит. Дьокуускай куорат дьаһалтатыгар улахан махталбытын тиэрдэбит”.
Строительнай уокурук дьаһалтатын салайааччы Савва Михайлов этэринэн, тутааччы дьаһайар хампаанньаны тэрийбит. Бу хампаанньа дьиэни көрөр буолуоҕа.
