Ил Түмэн Саха сирин улуустарыгар, ону тэҥэ Арктика зонатыгар, сөмөлүөтүнэн таһаҕаһы таһыыны чинчийиини сүрүннүүр. Дьокутааттар “Якутия” уонна “Полярные авиалинии” авиахампаанньаларга кыраһыын сыаната хайдах быһыылаахтык олохтонорун быһаарар наадалааҕын этэллэр.
Норуот дьокутаата Виктор Федоров Ил Түмэн бэрэссэдээтэлэ Петр Гоголевка ити чааһыгар анал чинчийии наадатын эппитин парламент өйөөтө. Федоров бэйэтин этиитигэр уматык сыаната биир кэлим буолбатаҕын ыйар. Холобур, “Якутия” АХ-ҕа биир туонна кыраһыын сыаната 81 тыһ.солк. буоллаҕына, “Полярные авиалинии” тэрилтэҕэ 67 тыһ.солк. сыаналанар. Аны туран, Ангарскайга биир туонна уматык 46 тыһ.солк. турар. Дьокутаат маны таһынан авиатырааныспарынан дьарыктанар “Аэропорт-Сервис” тэрилтэ хайдах быһыылаахтык чааһынай бас билиигэ киирбититтэн мунаарарын билинэр.
Санатан эттэххэ, ааһан эрэр сыл ыам ыйыгар Ил Түмэҥҥэ “Саха сиригэр салгын тырааныспарын сайыннарыы уонна хамсатыы кыһалҕалара” диэн тиэмэҕэ төгүрүк остуол буолбута. Ол түмүгүнэн авиакыраһыын сыанатыгар бэрэбиэркэ ыытылларыгар быһаарыы ылыллыбыта. Ити иннинэ өрөспүүбүлүкэтээҕи уонна федеральнай хаһыаттарга, тэлэбиидэнньэҕэ, саайтарга суруналыыстар Уһук Илиҥҥэ, ону тэҥэ Саха сиригэр сөмөлүөтүнэн айан тарыыптарын чинчийиилэрин дааннайа тахсыбыта.
Пленарнай мунньахха дьүүллэһии түмүгэр бу эйгэҕэ чинчийиини ыытарга дьокутааттартан анал хамыыһыйа тэрилиннэ. Хамыыһыйа ыыппыт үлэтин түмүгүнэн Ил Түмэҥҥэ сөптөөх быһаарыылаах уонна ыйыылаах дакылааты түһэриэхтээх.
