Үөрэх уонна наука министиэристибэтин пресс-сулууспата иһитиннэрэринэн, сэтинньи ый 13 күнүгэр П.А.Ойуунускай аатынан Саха Академическай тыйаатырыгар, “Кыайыы төрдө – билии!” диэн Саха сирин бастакы бэрэсидьиэнин Михаил Ефимович Николаев анал истипиэндьийэтин туттарыахтара.
Истипиэндьийэ сыала-соруга – иитии-үөрэтии сатабылын билинии, саҥаны айар-тутар талааннаах оҕолору, ыччаты, улахан дьону өйөөһүн. Бириэмийэ лауреаттара – Арассыыйа үрдүнэн ыытыллар олимпиадалар, научнай-практическай кэмпириэнсийэлэр кыайыылаахтара, идэлэрин толору баһылаабыт уһуйааччылар, бэйэлэрин холобурдарынан дьону-сэргэни билиигэ, научнай арыйыыга уонна айар үлэҕэ көҕүлүүр култуура, наука, үөрэх туйгуннара.
Былырыыҥҥыттан бу анал бириэмийэ аан дойду таһымыгар тахсыбыта. Ол курдук, бу үрдүк ааты Гонконгтан сылдьар үөрэх тэрилтэтин салайааччыта, бырабыыталыстыба сүбэһитэ Патрик Хан Чанг Лам уонна Соҕуруу Кэриэйэ уһуйааччыта Но Тэ Чол сүкпүттэрэ. Быйылгы лауреаттартан өрөспүүбүлүкэ үөрэҕин сайдыытыгар дьоһун кылаатын киллэрбит, профессор, Азияҕа ыытыллар физичэскэй олимпиада бэрэсидьиэнэ, биллиилээх квантовай физик-теоретик, Квантовай технология киинин салайааччыта, Сингапуртан сылдьар Леонг Чуань Квек буолар.
“Кыайыы төрдө – билии!” анал истипиэндьийэни анал хамыыһыйа сүбэтинэн туттарыахтара. Ол курдук, хамыыһыйаҕа өрөспүүбүлүкэ биллиилээх диэйэтэллэрэ, араас салааларга инники күөҥҥэ сылдьар исписэлиистэр киирдилэр. Бу тэрээһин сүнньүнэн, Саха сирин үөрэҕин уонна наукатын министиэристибэтэ сылын аайы араас тэрээһиннэри ыытар. Холобур, үгэс быһыытынан уһулуччу суолталаах научнай тиэмэлэргэ аналлаах стипендиаттар лиэксийэлэрэ, “төгүрүк остуоллар”, маастар-кылаастар, быыстапкалар, экскурсиялар ыытыллаллар.
