“National Geographic” АХШ Национальнай географическай уопсастыбатын сурунаала 30 ураты түмэл эриэйтиҥин таһаарда. Манна ХИФУ Петр Лазарев аатынан сэлии түмэлэ иккис миэстэни ылла. Бу туһунан университет пресс-сулууспата иһитиннэрэр.
Түмэл лабораториятын салайааччы, биологическай билим хандьыдаата Семен Григорьев кэпсииринэн, түмэлгэ 3000 остеологическай кэллиэксийэ баар. Үлэһиттэр научнай-чинчийэр үлэнэн дьарыктаналлар. Ураты булумньулар туһунан аан дойдутааҕы уонна өрөспүүбүлүкэтээҕи таһымнаах научнай бырайыактары суруйаллар. Ону таһынан хонууга үлэлииллэр.
Ааспыт сыллаахха 42 тыһ сыл анараа өттүгэр төрөөбүт икки хонуктаах кулунчук өлүгэ, улахан сэлии уҥуоҕа, хахай сыҥааҕын уҥуоҕа уо.д.а. көстүбүтэ.
“National Geographic” эриэйтиҥэр бастакы миэстэни Ижевск куоракка баар Михаил Калашников аатынан сэрии сэбин түмэлэ ылла.
