Дьокуускай куорат полициятын управлениетын ПДН иниспиэктэрдэрэ быйыл номнуо 14-с төгүлүн “Подари волшебство” диэн аахсыйаны ыыталлар.
ПДН начаалынньыга Дария Яковлева кэпсииринэн, нэһилиэнньэ кыаммат-түгэммэт араҥатыгар көмөлөһөр үтүө үгэһи “Дьокуускайдааҕы” ИДьМ МУ салайааччыта Николай Кульбертинов көҕүлээбит. Онтон ыла сыл аайы аахсыйа ыыра кэҥээн, үтүө санаалаах дьон көмөтүнэн 800-1000 бэлэх хомуллар. Быйыл номнуо тыһыынча курдук минньигэс бэлэх өрөһөлүү хомуллан турар. “Бу бэлэхтэри олох ыарахаттарыгар түбэспит уонна биһиэхэ учуокка турар ыаллар оҕолоругар түҥэтэбит. Бу иһэр-аһыыр төрөппүттэрдээх оҕолор эрэ буолбатах, манна тиийиммэт-түгэммэт ыаллар эмиэ киирэллэр. Сорох ыал оҕолоро бу эрэ бэлэҕи туталлар. Тоҕо диэтэххэ, оскуолаҕа, уһуйааҥҥа биэрэр харчылара суох. Түгэнинэн туһанан биһиги аахсыйабытыгар кыттар эрэллээх партнердарбытыгар улахан махталбытын тиэрдэбит”, – диэн Дария Яковлева кэпсиир.
Быйыл эмиэ үгэс курдук полиция үлэһиттэрэ Тымныы оҕонньор уонна Хаарчаана буолан 800 тахса ыалга күүтүүлээх бэлэхтэри түҥэтиэхтэрэ. Манна куорат бөдөҥ тэрилтэлэрэ, түмсүүлэрэ уонна биирдиилээн дьон кытталлара олус кэрэхсэбиллээх. “Ситим” медиа-бөлөх бу аахсыйаҕа хаһыс да төгүлүн кыттар. Ол курдук, быйыл Ил Түмэн дьокутаата Мария Христофорова аатыттан 15 минньигэс бэлэх уонна “Добрые ручки” аахсыйа чэрчитинэн хомуллубут 60 паара үтүлүк туттарылынна. Бу курдук аахсыйаҕа кыттаргытыгар ыҥырабыт.
Вадим Скрябин хаартыскаларыгар былырыыҥҥы аахсыйа түгэннэрэ
