Ахсынньы 20 күнүгэр тымныы полюһугар – Томторго, Н.М. Заболоцкай – Чысхаан аатынан орто оскуола саҥа дьиэтин үөрүүлээх арыллыыта буолан ааста. Бу туһунан СӨ бырабыыталыстыбатын пресс-сулууспата иһитиннэрэр.
220 миэстэлээх оскуола дьиэтэ өрөспүүбүлүкэ судаарыстыбаннай бырагыраамматын чэрчитинэн тутуллубут. Уопсайа 3400 кв м иэннээх таас оскуолаҕа успуорт уонна аактабай саалалар, бибилэтиэкэ, көмпүүтэр кылааһа, толору хааччыллыылаах тиис кэбиниэтэ, мастарыскыай уонна остолобуой баар.
Бастакы вице-премьер Алексей Колодезников Ил Дархан Айсен Николаев уонна бырабыыталыстыба аатыттан олохтоохтору, оскуола кэллэктиибин уонна үөрэнээччилэри эҕэрдэлээтэ. Ордук хоту сытар оройуоннарга саҥа оскуола улахан суолталаах диэн бэлиэтээтэ уонна оскуола кэллэктиибигэр, үөрэнээччилэргэ ситиһиилэри баҕарда.
Үөрүүлээх тэрээһиҥҥэ бырабыыталыстыба бэрэссэдээтэлин солбуйааччы Ольга Балабкина, Ил Дархан аатыттан саха тылын быһаарыылаах тылдьытын кэмпилиэгин уонна 100 экземпляр уус-уран литэрэтиирэни ылар сэртипикээти туттарда.
Оскуола дириэктэрэ Алена Егорова учууталлар уонна үөрэнээччилэр ааттарыттан Айсен Николаевка уонна бырабыыталыстыбаҕа улахан махталын тиэртэ.
Ил Түмэн бэрэссэдээтэлэ Петр Гоголев, Өймөкөөн улууһун баһылыга Иннокентий Сивцев эҕэрдэлээтилэр.
