Кытай Хэйлунцзян куоратын Интэриниэт-партаалыгар, Мэҥэ-Хаҥалас улууһа Муданьцзян куоракка 15 000 мэдиссиинэ мааскатын ыыппытын туһунан таһаарбыттар.
Бу иһитиннэриини улуус дьаһалтата бигэргэтэр. “Биһиги улууспут уонна Муданьцзян куорат номнуо уонтан тахса сыл бырааттыы сыһыаннаахпыт. Ол курдук, тыа хаһаайыстыбатын, култуура, успуорт уонна үөрэх эйгэтигэр бииргэ үлэлиибит. Биһиги оҕолорбут Муданьцзян куорат университеттарыгар киирбиттэрэ. Ааспыт сылга бастакы бөлөх оҕолоро тахсыбыттара. Ону таһынан, Кытайга сайыҥҥы лааҕырга сынньаналлар. Успуорт араас көрүҥэр тренердэрбитин атастаһан үлэлэтэбит. Биһиги бииргэ үлэлиир сөбүлэҥмит көмөтүнэн, өрөспүүбүлүкэҕэ шорт-трек сайдан эрэр”, — диэн улуус дьаһалтатын үлэһиттэрэ кэпсииллэр.
Көмө таһаҕаһы Муданьцзян куоракка бу нэдиэлэ саҥатыгар ыыппыттар. Улууска эмиэ мааскалар атыыланаллар.
