Бүгүн Мэҥэ Хаҥалас төрүттэммитэ 90 сылын өрөгөйдөөх үбүлүөйүн Д.Ф.Ходулов аатынан норуот айымньытын дьиэтигэр улуус устуоруйатын сырдатар туруоруунан саҕалаатылар. Мэҥэ хаҥаластар Өрөгөй ырыаларын М.К. Попова аатынан оҕо ускуустубатын оскуолатын ансаамбылын тыыннаах доҕуһуолунан, Майа уонна Төҥүлү народнай хуордара, сааланы толору мустубут дьон бука бары сүһүөхтэригэр туран толордулар.
Улуус баай устуоруйатыттан сүрүн дакылааты Оройуон Сэбиэтин бэрэссэдээтэлэ Павел Сазонов оҥордо. Бу дьоро күн үлэни өрө туппут дьоммутун наҕараадалааһын буолла. СӨ үтүөлээх үлэһиттэрин ааттара Нина Колосоваҕа, Мария Захароваҕа иҥэрилиннэ, “Гражданскай килбиэн” бэлиэнэн Прокопий Макаров наҕараадаланна. «Мэҥэ Хаҥалас улууһун Бочуоттаах гражданина» ааттары Роман Брызгалов, Алексей Игнатьев, Олег Марков, Дария Назарова, Иван Новгородов, Виталий Пестряков уо.д.а. сүктүлэр. “Мэҥэ аат” бочуот кинигэтигэр Иван Борисов, Дмитрий Стручков уонна Дмитрий Сыромятников ааттара киирдилэр.
Бэйэлэрин эҕэрдэлэрин Ил Түмэн тыа сиригэр уонна аграрнай бэлиитикэтин сис кэмитиэтин бэрэссэдээтэлэ Андрей Находкин, Судаарыстыбаннай мунньах дьиэ кэргэҥҥэ, успуорка сис кэмитиэтин бэрэссэдээтэлин солбуйааччы Юрий Баишев, биир дойдулаахпыт биллиилээх судаарыстыбаннай диэйэтэл Матвей Мучин тиэртилэр. “Мэҥэ хаҥаластар дойдубут аатын сураҕырда туруоҕуҥ“, – диэн ыҥырдылар.
Муниципальнай тэриллиилэр куонкурустарыгар кыайыылаах нэһилиэктэр, араас хайысхаҕа бастыҥнар бэлиэтэннилэр.
Үөрүүлээх чаас бэртээхэй сэргэх кэнсиэринэн түмүктэннэ. Кэнсиэри биир дойдулаахпыт, пародист Александр Бурнашев иилээн-саҕалаан ыытта. Улууспутуттан төрүттээх артыыстар, тахсан эрэр талааннар эҕэрдэ нүөмэрдэри көрдөрдүлэр.
Виктория Белолюбская, ulus.media/
