Сүлдьүкээргэ 300-чэ киһи олорор. Баһыйар үгүһэ – эбэҥкилэр. 1970 сыллаахха саҥа оҕо уһуйаана арыллан, “Колобок” диэн ааттаммыта. Бу иннинээҕи кэмҥэ бөһүөлэк көс аҥаардаах олохтоох этэ. Сүлдьүкээр билиҥҥи турар сиригэр Улуу Тоҕоттон (Бүлүү муоратын анныгар хаалбыта) көһөн кэлбитэ.
Олохтоохтор сүрүн дьарыктара таба иитиитэ этэ. Үгүс оҕолор дьоннорун кытта таба ыстаадаларыгар сылдьыбыттара. Сорох табаһыт ыаллар оҕолорун чугас дьонноругар хааллараллара. 70-с сылларга Сүлдьүкээргэ “Колобок” оҕо уһуйаана арыллан, тыа дьонугар туһалаабыта сүҥкэн. Кырачааннар төрөппүттэрэ куруук табаҕа сылдьар, аар тайҕаҕа бултуур буоланнар, дьыссаакка бүтэйдии эрэнэллэрэ. Оҕо уһуйаана кэнэҕэски көлүөнэҕэ үтүөнү, кэрэни бэлэхтээбитэ үгүс. Ону нэһилиэк олохтоохторо, кырдьаҕаһыттан эдэригэр тиийэ сылаастык саныыллар. Соторутааҕыта Мииринэйдээҕи АНОДУ “Алмазик” састаабыгар киирэр, 20-с нүөмэрдээх “Колобок” оҕо уһуйаанын чиэстээһин буолан ааста. Мииринэйтэн Светлэй бөһүөлэгиттэн ыалдьыттар кэллилэр. Дьыссаат иитиллээччилэрин баай ис хоһоонноох кэнсиэрэ буолла. Олус истиҥ, иһирэх тэрээһин мустубут дьону сэргэхситтэ.
Маргарита Саввинова хаартыскаларыгар “Колобок” оҕо уһуйаанын кэллэктиибэ.
Станислав Алексеев, Мииринэй куората.
