РФ бырабыыталыстыбатын бэрэссэдээтэлэ Михаил Мишустин, вице-премьергэ Татьяна Голиковаҕа уонна үп миниистиригэр Антон Силуановка, коронавирус утары үлэлиир быраастары бириэмийэлиир анал пуонданы тэрийэргэ сорудахтаата. Бу туһунан “РИА Новости” иһитиннэрэр.
“Татьяна Алексеевна уонна Антон Германович, эһиэхэ олохторун, доруобуйаларын толук ууран туран коронавирус утары үлэлиир быраастары бириэмийэлиир анал пуонданы тэрийэргэ сорудах биэрэбин”, – диэн Михаил Мишустин вице-премьердары кытта суһал мунньахха иһитиннэрдэ.
Кулун тутар 11 күнүгэр Доруобуйа харыстабылын аан дойдутааҕы түмсүүтэ “COVID-19” диэн пандемиялаах саҥа коронавирус тарҕаммытын туһунан иһитиннэрбитэ. Аан дойду үрдүнэн 140 дойдуга 153 тыһ тахса киһи ыалдьыбыта бэлиэтэммит. Олортон улахан аҥаара үтүөрбүт уонна 5,7 тыһ киһи өлбүт.
