Кулун тутар 18-тан 27 күнүгэр диэри өрөспүүбүлүкэ оскуолаларыгар каникул биллэрилиннэ. Ол кэнниттэн оҕолор дистанционнай үөрэххэ көһүөхтэрэ.
Өрөспүүбүлүкэҕэ коронавирус (COVID-19) ыарыыта тарҕанар куттала улааппытынан, Ил Дархан Айсен Николаев муҥутуур бэлэмнээх буолуу туһунан ыйаахха уларытыылары киллэрдэ. Ол курдук кулун тутар 18 күнүттэн 27 –гэр диэри өрөспүүбүлүкэ оскуолаларыгар каникул биллэрилиннэ. Ол кэнниттэн оҕолор дистанционнай үөрэххэ көһүөхтэрэ.
СӨ үөрэх министиэристибэтигэр быһаарбыттарынан, дистанционнай үөрэх “Российская электронная школа”, “Учи.ру” “Яндекс. Учебник”, “Я класс”, “Сетевой город. Образование” диэн онлайн-платформаларга ыытыллыан сөп. Ону таһынан, кулун тутар 18 күнүттэн профессиональнай үөрэх кыһаларын устудьуоннара дистационнай үөрэххэ көһүөхтэрэ. Эбии үөрэхтэр уонна дьарыктар ыытыллыбаттар.
Коронавирус саҥа инфекцията (COVID-19) тарҕаммыт дойдуларыгар сылдьыбыт дьон, СӨ доруобуйа харыстабылын линиятыгар 8 (800) 1001403 эрийэн дойдуларыгар кэлбиттэрин туһунан биллэрэллэрэ булгуччулаах. Сибики баар буоллаҕына быраастары дьиэҕэ ыҥыран көрдөрөр ордук. Кытайтан, Кэриэйэттэн, Италияттан, Ирантан, Францияттан, Германияттан, Испанияттан о.д.а. бу ыарыы тарҕаммыт дойдуларыттан кэлбит дьон уонна кинилэр дьиэ кэргэттэрэ 14 күн устата ханна да тахсыбакка дьиэлэригэр олоруохтаахтар. Ол курдук үлэлэригэр, үөрэхтэригэр барбаттар, үгүс дьон мустар сиригэр сылдьыбаттар. Үлэ биэрээччилэр балыыһа лииһин биэрэр эбээһинэстээхтэр уонна хамнас төлөнүөхтээх.
