Ил Түмэн дьокутаата Мария Христофорова СӨ Бырабыыталыстыбатын бэрэссэдээтэлигэр Владимир Солодовка туһаайан, ЯТЭК салайааччытын эппиэтинэскэ тардарга туруорсан маннык ис хоһоонноох суругу ыыппыт:
Ытыктабыллаах Владимир Викторович!
Кулун тутар 17 күнүгэр Ил Дархан А.С. Николаев “О введении режима повышенной готовности на территории Республики Саха (Якутия) и мерах по противодействию распространению новой коронавирусной инфекции (2019-nCoV” диэн ыйааҕа тахсыбыта.
Бу дьыл кулун тутар 11 күнүгэр, “ЯТЭК” ПАУо генеральнай дириэктэрэ А.В. Коробов Москубаттан Дьокуускайга көтөн кэлбитэ. Кини ол иннинэ бу саҥа коронавирус инфекцията күүскэ тарҕанар суостаах, бэрдэ суох дойдутуттан – Швейцарияттан кэлбитэ биллэр. Оттон Дьокуускайга кэлбитин кэннэ, кини анаалыһыгар бу ыарыыны булан бигэргэппиттэрин бары билэбит.
Москуба мээрэ С.С. Собянин кулун тутар 5 күнүнээҕи 12-УМ №-дээх “О введении режима повышенной готовности” ыйааҕыгар олоҕуран, тас дойдуттан кэлбит Андрей Коробов Арассыыйаҕа төннүбүтүн туһунан боломуочуйалаах уорганнарга тута биллэриэхтээх этэ уонна 14 күн иһигэр ханна да барбакка-кэлбэккэ, дьиэтигэр сытыахтаах этэ.
Ол эрээри кини бу ыйааҕы кэһэн туран, сыалай эрэгийиэни, ол иһигэр бэйэтэ салайар стратегическай суолталаах тэрилтэтин кутталга киллэрбитин иһин, быраап уонна этика өттүнэн сыанабылы биэрэн туран, сөптөөх миэрэни ыларгытыгар көрдөһөбүн.
Ытыктабылы кытары, норуот дьокутаата Мария Христофорова.
